Тазалық, тәртіп, реттілік қашанда маңыздылығын жойған емес. Әсіресе күн санап көркейіп, құрылыс пен сауда ісі қарқын алған Семей қаласы үшін тіптен ерекше. Бұл ретте атқарушы билік пен жергілікті тұрғындарға артылар жауапкершілік ортақ. Туған қаламыздың көрікті һәм көшелерінің келісті болмағы ең бірінші кезекте өзімізге байланысты. Осы ретте Семей қаласының әкімі Ермак Сәлімов күннің жексенбісіне қарамастан, әкімдіктің бірқатар бөлімдері басшыларымен және тәртіп сақшыларымен бірлесіп шаһардағы ірі базарларды аралады. Мақсат соңғы кездері етек алып бара жатқан жабайы сауда мен базарлардағы тәртіп және санитарлық тазалық мәселелерін қадағалау болатын.
{jcomments on}Шаһар басшысы бастаған әкімдік өкілдері ең алдымен халық нөпірі қалың орталық базарға келді. Мұнда бұдан бұрындары да бірқатар проблемалар анықталған болатын. Атап айтсақ, базар ішін көктей өтетін Чехов көшесінің бойы жайма базарға айналып, тым тарылып кеткен. Жаяулы, арбалы жүргіншілер мен ауыр жүк машиналары мұндағы ахуалды тіптен күрделендіруде. Оның үстіне көкөніс пен жеміс-жидек саудасы да рұқсат етілмеген жерлерге дейін шығып кетіпті.
Бұл жерде жол полициясы қызметкерлері жиі тексеру жүргізіп, аумақтағы қозғалысты қиындатқан көлік иелеріне айыппұл да салуда. Мәселен, ағымдағы жылдың 7 айының ішінде 108 хаттама толтырылыпты. Барлығы да рұқсат етілмеген жерге тоқтаған көлік иелері. Алайда одан жағдай өзгерер емес. КамАЗ көліктері мұнда түн мезгілінде кіріп, күндіз жүк түсіріп, сауданы қыздыруда. Таяу маңда тұрған ескертпе белгіні де елейтіндер аз. Ал автокөлік тұрағындағы орындар көкөніс тиеген ауыр жүк көліктеріне толы.
Осы жайттың барлығын көңілге түйген Ермак Бидахметұлы тіпті кейбір саудагерлермен тілдесіп, сөзге де тартты. Әрине, күнкөріс қамымен сауда жасаудың сөкеттігі болмағанмен, белгіленген тәртіп пен заң аясынан ешкімнің де аспауы тиіс. Ал базар маңындағы Чехов, Аймауытов көшелеріндегі жабайы сауда, жиі рейд жүргізіліп, қадағалау шарасы жүргізілгенімен, толас-тар түрі жоқ.
Тәртіп сақшыларының айтуынша, мұндай заңсыздықтарды бірнеше мәрте қайталағандарды қамауға алуға да болады. Әйтсе де мұнда сауда жасайтындардың наразылығына қалмас үшін көп жағдайда ескерту жасаумен ғана шектеледі екен.
Қала әкімі сонымен қатар базар маңындағы қоқыс мәселесін де назарға алды. Әсіресе іргелес орын тепкен қоймалар маңындағы тазалық сын көтермейді екен. Бұл жайында Ермак Бидахметұлы қалалық тұтынушылар құқығын қорғау басқармасының басшысы Бағлан Шегедековке және қалалық кәсіпкерлік бөлімі басшысының міндетін атқарушы Бауыржан Юсуповқа бірқатар тапсырмалар жүктеді. Бұл ретте базар мен сауда орындары басшыларымен жұмысты күшейту қажет.
Ермак Бидахметұлы жабайы сауданың алдын алудың тағы бір тиімді жолы саудамен айналысушыларға қолайлы жағдай жасау екендігін айта келіп, бұл тарапта қалалық кәсіпкерлік бөліміне осы бағыттағы жұмысты ширату қажеттігін жеткізді.
Осы ретте Семейдің сол жағалауындағы Жаңа құрылыс (Новостройка) ықшам ауданындағы «Жаңа базар» әкімшілігі қала әкімі Ермак Сәлімовтің ескертуіне құлақ асып, жабайы сауда жасаушыларға жағдай жасауға уәде берген көрінеді. Әрине, мұндай жақсы жаңалықтың жол жағалаған саудагерлер үшін көмегі көп. Болашағы бар бастаманың жолда қалмасына үміттіміз.
Р.S Мақала баспаға дайындалып жатқан кезде «Жаңа базар» басшысы Нұржан Күлшігішевпен хабарласқан едік:
— Қала әкімінің тапсырмасына сәйкес, қаланың бас сәулетшісімен бірлесе отырып, жабайы сауда жасаушыларға жағдай жасау мақсатында базар маңындағы бос орынға сауда нүктелерін ашу жобасы дайындап, әкімнің қарауына ұсындық. Бұл орындардың тек жазда ғана емес, қыс мезгілінде де сауда жасауға қолайлы болуын ойластырып отырмыз, — деген жауап алдық.
«СТ — ақпарат»
