Бүгінде жастардың спортпен айналысуына барша жағдай жасалып, ізгілікті істер қолға алынуда. Жалпы, Семей қаласында бұқаралық спортты дамыту, салауатты өмір салтын қалыптастыру бағытындағы жұмыстар жүйелі түрде атқарылып келеді. Айта кету керек, шаһарда соңғы жылдары мемлекет есебінен, іскер азаматтардың да ұйытқы болуымен спорттық нысандар бой көтеріп, халық игілігіне берілуде.
Аяқдопқа әуесқойлар үшін тағы бір жағымды жаңалық: спортшылардың төл мерекесі қарсаңында, 14 тамыз күні, шаһарда тағы бір шағын футбол алаңы ашылды. Түйемойнақ аралындағы жасанды жабынмен жабдықталған шағын футбол алаңының ашылуына Семей қаласының әкімі Ермак Бидахметұлы Сәлімов қатысты.
{jcomments on}Өткен жылдың маусым айында Семей қаласы әкімдігі мен «Сәт Транс» ЖШС Түйемойнақ аралында шағын футбол алаңын салу жөніндегі меморандумға қол қойған еді. Бүгінгі таңда аралдағы шағын алаңның құрылысы аяқталып, пайдалануға берілді. Алаңның салтанатты ашылуында құттықтау сөз қала әкімі Ермак Сәлімовке берілді.
— Бүгінде Семейде спортты дамыту мақсатында көптеген шаралар атқарылып жатыр. Оған «Сәт Транс» ЖШС сынды демеушілер де өз үлестерін қосып, осындай тамаша шағын футбол алаңын қолданысқа беріп отыр. Спортпен шұғылдану жастарға физикалық және рухани тұрғыдан мықты болып дамуына септігін тигізері сөзсіз, — деді қала әкімі Ермак Сәлімов.
Демеушілер атынан «Сәт Транс» ЖШС директорының орынбасары Думан Азанбаев сөз алып, спортсүйер қауымды құттықтады.
— Осының барлығы келешек жастарымыз үшін. Бұл — «Сәт Транс» ЖШС-нің спортқа аз болса да қосып жатқан үлесі, — деген Думан Азанбаев футбол алаңының кілтін қала әкіміне табыс етті.
Ал Қазақстанның құрметті спорт қайраткері, самбодан екі дүркін әлем чемпионы, еліміздің бірнеше дүркін чемпионы, ардагер спортшы Хамит Ысқақов қаламызда осыған дейін де бірнеше спорт алаңдары ашылғанын, бұл жастарға спортпен тұрақты түрде шұғылдануға жасалып жатқан жағдай екенін атап өтті.
— Құрметті спортшылар, шағын футбол алаңының ашылуымен құттықтаймын. Осындай шаралар алдағы уақытта көп бола берсін. Шағын футбол алаңы үлкен спорт стадионына айналсын. Келешек жастарымыз Қазақстанның чемпионы болып, қазақтың көк байрағын әлемде көтере берсін. Ақ жол тілеймін, — деді спорт ардагері.
Шағын спорт алаңының ашылу рәсімі балалар аула клубтары арасындағы спорттық бәсекеге ұласты.
Асан МЫРЗАХАНОВ,
«Семей таңы»
