Малдәрігерлік қызмет саласы салғырттықты көтермейді. Бұл бағыттағы іс-қиымыл, атқарылған шаралардың барлығы бірінші кезекте азық-түлік қауіпсіздігін қамтамасыз етпек. Азық — түлік қауіпсіздігі дегеніміз халық денсаулығының кепілі екені белгілі. Ең үлкен жауапкершілік те осында жа
{jcomments on}14 тамыз күні Семей қаласы әкімдігінде Ермак Сәлімовтің төрағалығымен өткен жиынның басты мақсаты да осы сала қызметін ширатуға арналды. Семей аумағындағы ветеринария қызметінің жұмысы жөнінде ұйымдастырылған басқосуға ШҚО ветеринария бас-қармасының бастығы Нұржан Тоқсейітов бастаған облыстық мекемелердің өкілдері қатысты. Ауылдық округ әкімдері мен барлық ветеринарлар да осы ортада болды. Алдымен аумақтағы малдәрігерлік қызмет турасында Семей қалалық ветеринария бөлімі бастығының орынбасары С.Мукияновтың есебі тыңдалды. Орынбасар есебінде айтылған қаражат, автокөлік, маман санының жетіспеушілігі, ауылдағы қосындарда Интернет байланысының жоқтығы көтерілді. Алайда аталған мәселелер жиын барысында себептен гөрі, сылтау ретінде қабылданды. Басқосуға белгісіз себептермен келмей қалған бөлім басшысы А. Жарқынбаев атына да сын айтылды. Облыстық басқарма басшысы Нұржан Тілеужанұлы алдымен қолдағы бар мүмкіндікті пайдаланып та талай жұмыс тындыруға болатынын, қазіргі көтеріліп отырған мәселені шешуге қатысты басқармаға бірде-бір ұсыныс түспегенін ашық жеткізді. Мәселен, қызметтік көлік қалалық бөлімде болмағанымен, ауылдық ветеринарлық қосындардың барлығы автокөлікпен қамтамасыз етілген. Әзірге солармен септесіп, тиісті жұмыстарды жандандыруға болатынын айтты. Сол себепті аумақтағы ветеринарлық қызмет бөлімі тарапынан дұрыс ұйымдастырылмай отыр деген тоқтам жасалды. Тағылған сынның кейбіріне тоқталсақ, ауылдық округтердегі өлексе көму орындарын (скотомогила) толық құжаттандырмау, бруцеллезге шалдыққан малды мерзімінде еткомбинатқа өткізбеу, қаңғыбас иттердің азаймауы, «Сары» базарындағы жәрмеңкенің антисанитарлық жағдайы секілді біраз ескертпелер жасалды.
Жиынды қорытындылаған қала әкімі Ермак Сәлімов ветеринария бөлімінің қызметіне қатысты көзқарасын ашық айтып: «Бөлімнің атқарған жұмыстарына тиісінше дұрыс баға берілуі үшін, арнайы комиссия құрылды. Алдағы уақытта комиссия құрамы заң аясында талдаулар жасап, бөлімге жүктелген міндеттердің қандай деңгейде жүзеге асырылғаны жөнінде өз қорытындыларын шығарады. Сол кезде жүргізілген жұмыстардың нақты бағасы берілетін болады»,- деді.
Сонымен бірге қала басшысы ауыл әкімдері мен барлық ветеринарларға қазіргі бюджет тапшылығына жалтақтай бермей, қолдағы барды тиімді пайдаланып, ұқсата білсек, бірқатар сұрақтарды кедергісіз шешуге болатындығына дәлелдер келтірді. Ауылды өңірлерде, негізінен, мал шаруашылығы болғандықтан, мамандардың бүкіл уақыты осы саланы дамытуға жұмсалады. Көп жағдайда мамандардың қырағылығы үлкен рөл атқаратындығын естен шығаруға болмайтындығын айтты.
Қала әкімінің баспасөз қызметі.
