Үкімет ішкі нарықтағы бензин тапшылығын болдырмау мақсатында бағаны реттеуден бас тартқан соң, нарықтағы кейбір алыпсатарлар осы жағдайды өздеріне тиімді тұрғыдан пайдаланып, жанармай бағасын негізсіз көтеруі мүмкін. Сондықтан олардың әрекеттері қатаң бақыланатын болады. Бұл туралы өткен жұма күні ОКҚ баспасөз мәслихатында ҚР Премьер – министрінің бірінші орынбасары Бақытжан Сағынтаев мәлім еткен болатын.
Енді бензин бағасын нарықтың өзі анықтап, жанармай бекеттерінде баға әртүрлі болады. Осы ретте Семей қаласындағы бірқатар жанармай бекеттерінде жүргізушілер көп тұтынатын АИ — 92/93 маркалы бензин бағасы өскендігін аңғаруға болады.
Семей қаласында АИ – 92 маркалы бензиннің орташа бағасы литріне 125 теңгені құрап отыр. Осы көрсеткіш шаһардағы «Ait» және «ҚазМұнайГаз» жанармай бекеттерінде тіркеліпті. Ал «ГазпромНефть» пен «Helios» жанармай бекеттерінде 92 маркалы бензин 127 — 129 теңгеден белгіленген. Сондай-ақ АИ-80 маркалы бензин құны литріне 89 теңге көлемінде тұрақтаған. Мұндай бағаны «Ait», «ҚазМұнайГаз» және «Helios» жанармай бекеттерінен көруге болады. Тек «САТ» және «Газ-промНефть» станцияларында АИ-80 маркалы бензин 86 теңгеден сатылуда. Дизельді отынның шаһардағы орташа бағасы 90 теңгені құраған. Алайда 88 — 93 теңге аралығында сатып жатқан ЖҚС да кездестіруге болады.
Жақсылық МҰРАТҚАЛИ, «Семей таңы»
