Өткен аптада қала әкімі Ермак Сәлімов «Семей былғары- мех комбинаты» мен «Семей кеме жасау және кеме жөндеу зауыты» ЖШС-де болып, кәсіпорындардың бүгінгі жұмысымен танысты. Кездесу барысында кәсіпорын басшылары қала әкіміне өндіріс ошақтарының жұмыстары жайында мағлұмат берді.
«Семей кеме жасау және кеме жөндеу зауыты» ЖШС-нің директоры М.Воронова қала әкімі Ермак Бидахметұлына кәсіпорын жұмысшылары Павлодар қаласынан әкелінген кемеге жөндеу жұмыстарын жүргізетінін айтып өтті. Алайда бұл жұмыстар үшін кәсіпорын өз жұмыс күшін толыққанды пайдаланбайды. Сондықтан, кәсіпорын толыққанды өз қуатында жұмыс жасауы үшін, қосымша тапсырыстар қажет. Бұл ретте қалалық депутаттық корпус, жергілікті атқарушы билік органдары мен зауыт әкімшілігі тапсырыс көлемін арттыру мақсатында ҚР Инвестициялар және даму министрлігіне ұсыныс жіберуді шешіпті. Егер де бұл бастама министрлік тарапынан қолдау табатын болса, кәсіпорында кемелерді жөндеу жұмыстары жандана түсетіні сөзсіз.
Сонымен қатар Ермак Сәлімов «Семей былғары-мех комбинаты» ЖШС де аралап көріп, комбинат ұжымымен жүздесті. Кездесу кезінде мекеме басшысы Жұмағазы Рақымғалиев қала әкіміне комбинатта был-ғары мен теріден дайындалған өнімдерді таныстырды. Мұнда тері шикізаты 8 цехтен өңделіп дайындалады. Аталмыш кәсіпорын Қазақстан бойынша бірегей нысандардың қатарына кірген. Бұған қоса өз тауарларын басқа елге экспортқа шығаруға қауқары бар. Комбинатта заманауи итальяндық қондырғы орнатылған. Қазіргі күнде көршілес Қытай елімен 400 млн. теңгеге келісімшартқа отырған. Осы ретте комбинат директоры Ж. Рақымғалиев шаһар басшысына бірінші кезекте жергілікті ауыл шаруашылығы құрылымдарымен әріптестік орнатуға басымдық бергісі келетінін, ол үшін ірі қара малының терісін нарықтық бағамен сатып алуға дайын екенін жеткізді.
Бұдан бөлек Ермак Сәлімов «Ертіс» спорт кешенінің жұмысымен де танысып, қалалық дене шынықтыру және спорт бөлімінің басшысына оқушылар мен студенттерді тартып, мұнда мейлінше спорттық шараларды жиі өткізуге тапсырма жүктеді.
Қала әкімінің баспасөз қызметі.
