Бүгінде Семей қаласы бойынша жабайы саудамен күрес жұмыстары біршама қарқын алуда. Қала әкімі Ермак Сәлімовтің бастамасымен шаһар келбетіне залалын тигізетін, санитарлық тазалық нормаларына қайшы келетін ретсіз сауда орындарына рейд жүргізіліп, нысандар басшыларымен, сауда-саттық жүргізушілермен мәміле жасалған еді. Бұл бағыттағы шаралар, осылайша, күн тақырыбындағы өзекті мәселеге айналды.
{jcomments on}Шаһардың сол жағалауындағы «Жаңа Семей» сауда кешенінің құрылысы бүгінде қарқынды жүргізілуде. Жаңа нысан пайдалануға беріліп, толық жұмысқа көшкен шақта, қаланың осы бөлігіндегі жабайы сауда мәселесі біршама шешімін табатын болады. Бүгінде бұл шараны аталмыш кешен басшылығы қала әкімі Ермак Бидахметұлының ұсынысына орай жүргізуде.
Қазіргі күні «Океан», «Жаңа Семей» және «Юбилейный» сынды ірі сауда ошақтарының маңын жайма базарға айналдыр-ған жандар жылдың кез келген мезгілінде осы орында тұрып, тұрақты түрде нәсібін айырып келеді. Бұл сүреңсіз көрініс қала әдемілігіне нұқсан келтіріп қана қоймай, аймақтың санитарлық тазалық нормаларының өрескел бұзылуына да әкелген еді. Тіпті тротуарлар үстіне дейін шығып, жаяу жүргіншілерге кедергі кел-тірген жағдайлар да аз болмады. Осы кезеңге дейін оларға айыппұл да салынды. Ескертулер де жасалды. Әйтсе де ай- қын байқаларлықтай нәтиже орын алған жоқ болатын. Қала әкімі бұл мәселені оңтайлы шешудің жолын қарастыра келіп, рұқсат етілмеген жерлерде сауда жасаушыларға жаңа орындар ұсынуды қажет деп тапқан-ды. Осы ретте аталмыш аумақтағы бірқатар ірі кешендердің басшысымен келісе отырып, күнгөрісін жабайы сауда арқылы айырып жүрген жандарға қосымша орын әзірлеуді ұсынған еді.
Жемісті жүргізілген шаралар нәтижесінде аталмыш аумақтағы жабайы сауда мәселесі қазіргі таңда біршама шешімін тауып келеді.
Семей қаласының әкімі Ермак Сәлімов пен шаһардың бас сәулетшісі Қалдыбек Қоқиланов осыдан біраз уақыт бұрын жаңа сауда нысанының жобасын бекітті. Соның аясында Жаңа-құрылыс ауданында «Жаңа Семей» сауда кешенінің құрылысы бастау алған еді. Нысан аумағы ауқымды болмақ. Арнайы күзе-тілетін кешенде жылдың кез келген мезгілінде сауда жасауға қолайлы павильондар қойылатын болады. Аталмыш кешен басшылығының айтуынша, мұнда шамамен 50 сауда нүктесі қалалықтарға сапалы қызмет көрсетпек. Бұдан өзге шағын дүңгіршектер жұмысы да қарастырылуда. Сауда орындары бірінші кезекте көше бойындағы ретсіз саудаға жол бергендерге ұсынылатын болады. Тек содан кейін ғана бұл орындар ынта білдірген өзге де кәсіпкерлерге берілмек. Сонымен қатар нысан басшылығы алғашқы айда жалға алу ақысын алмайтындықтарын айтады. Осы арада тоқтала кетер жайт — еркіндікте, ретсіз сауда жасап үйреніп қалған жан- дарға қатаң санитарлық талаптарға көндігуге тура келеді. Себебі тауарлардың барлығы арнайы зертханалық тексеруден өтеді. Яғни сапаға кепілдік беріледі.
— Алдымен біз осы Жаңа Семей аумағындағы жабайы саудаға жол берген азаматтарға орын ұсынатын боламыз. Артылып жатса, қаланың өзге бөлігіндегі саудагерлерге де бізбен әріптестік орнатуларына мүмкіндік жасаймыз. Мұнда сауда мәдениетін сақтаудың барлық мүмкіндігі жасалады. Арнайы павильон, күзет, жарықтандыру жоғары деңгейде болады. Сондай-ақ тәртіп, санитарлық сынды талаптар да қатаң сақталады, — дейді аталмыш кешеннің әкімшісі Рахиля Әубәкірова.
«Жаңа Семей» сауда кешені жуық арада жұмысын бастауы тиіс болатын. Алайда қажетті құрылыс материалдарының тапшы болуы мен жобаның өзгеріске ұшырауы нысанды пайдалануға беру мерзімін шамалы ұзартып отыр. Әйтсе де, болжам бо-йынша, жаңа сауда орны келер апталарда ашылуы мүмкін. Ал толыққанды қызмет көрсетуі үшін, әлі шамалы уақыт керек көрінеді.
Қуаныш ЖОЛЫМБЕТ,
«Семей таңы»
