Азық-түлік бағасын тұрақтандыруда жәрмеңкелер ұйымдастырудың маңыздылығы зор. Осыны ескерген Бесқарағай ауданы әкімдігі жаңа піскен биылғы түсімнен мол әкеліпті. Семейліктерге өнім ұсынуға 50 шақты бесқарайғалық сауда жасаушы қызмет көрсетті. Араларында «Балке», «Қалиханұлы», «Стелла» сынды аудандағы ірі шаруа қожалықтарының өкілдері де бар екен.
{jcomments on}Бұл күні семейліктер әсіресе пияз, сәбіз, орамжапырақ сынды бақшалық өнімдерді көтерме бағамен мол сатып алды. Сондай-ақ жеткізілген 15 тонна картоп та әп-сәтте сатылып кетті. Айта кетерлігі, туарлардың барлығы да Семейдегі базар бағасынан 10 пайызға арзан екен. Қалалықтарды сонымен қатар бесқарағайлық омарташылар өндірген бал да қызықтырды. Бұдан өзге жұмыртқа, құс еті де шаһар нарығынан арзанған сатылды. Тұтынушылар сұранысы ет өнімдеріне мол болды. Бесқарағайлықтар жәрмеңкеге 4,5 тонна ет өнімдерін әкелген екен. Оның ішінде екі ту бие мен 20 қой еті әкелініп, жас еттің келісі 800, 1000 теңгеден саудаланды.
Барлық ауылдық округтерден ынта білдірген екі-үш шаруа қожалықтары өкілдерін ауыл әкімдері бастап келіпті. Бұл күні семейліктер үшін концерттік бағдарлама да әзірленген екен. Аудандық мәдениет үйінің өнерпаздары базаршылаған қауымға ән мен жырдан да шашу шашты.
Қуаныш ЖОЛЫМБЕТ,
Семей таңы
