ҚАРТТЫМЫЗДЫ ҚҰРМЕТТЕГЕН ХАЛЫҚПЫЗ!
Қазыналы қарттарды сыйлау, оларға құрмет көрсету – ғасырлардан бері жалғасып келе жатқан салтымыз. Бұл қазақы дәстүрдің бүгінгі таңда да жалғастық табуы – өнегеліліктің белгісі саналады.
Қариялардың өмірлік тәжірибелері мен ақыл-кеңестері, тәлім-тағылымдары біз үшін, өскелең буын үшін ерекше маңызға ие. Қазіргі күні еңбектерінің зейнетін көріп отырған шақта да кейінгі толқынға игілік пен ізгіліктің, пайым-парасаттың үлгісін танытудан жалыққан емес. Өмірлерін елінің әлеуметтік-экономикалық тұрғыдан дамуына һәм мәдени-рухани өркендеуіне арнаған бұл жандарға бүгінде қандай құрмет көрсетсек те артық етпейді. Ұлт Көшбасшысы, Елбасы Нұрсұлтан Назарбаев: «Қазір біз аталарымыз бен әкелеріміздің арқасында бейбіт аспан астында өмір сүрудеміз, қуатты мемлекет құрып, болашаққа сеніммен қарап отырмыз» деп атап өткен болатын. Ендеше бүгінгі жетістігіміз үшін егде буын алдында борыштармыз.
БҰҰ шешіміне сәйкес әр жылдың 1 қазаны Қарттар күні болып жарияланғаны белгілі. Бұл күн бүкіл әлем бойынша аталып өтеді. Осынау игілікті шара үлкенге ізет көрсетуді әдептіліктің озық үлгісі санайтын біздің халқымыз үшін де дәстүрге айналған. Осы орайда қаламыздағы кәсіпорындар мен мекемелерге, бастауыш ардагерлер ұйымдарымен және кәсіподақ ұйымдарымен бірлесіп, Қарттар күнін лайықты деңгейде өткізу мақсатында арнайы іс-шаралар жоспарын әзірлеуге, ардагерлер қауымына құрмет көрсетуге шақырамын. Аталған күнге орай жиындар өткізіп, алдыңғы толқынның еңбектегі жетістіктерін кейінгі буынға үлгі ету міндет. Қарияларымызға моральдық және материалдық көмек көрсету — оларға жасалған қамқорлықтың айғағы болары анық. Әсіресе, жалғызбасты, науқас қарттарға ерекше көңіл бөліп, оларға тұрмыстық тұрғыдан жәрдемдесу, дәрі-дәрмек сатып алуда нақты көмек көрсету сұралады. Бұл Үндеу сонымен қатар, қаламыздағы Жастар ұйымдарына, қамқорлық көрсетуде демеушілігімен танылып жүрген жергілікті кәсіпкерлерге де арналады.
Қарттар күні аға ұрпақтың қоғам өміріне қосқан үлесіне шынайы алғыс білдіретін және ардагерлерге қамқорлық көрсететін күн. Ендеше осынау игілікті үрдістен биыл да жаңылмай, қариялар ризашылығына, бата-тілегіне кенелу ләзім!
Барлық салалық қызмет өкілдері, мекемелер басшылары мен кәсіподақ ұйымдары осынау маңызды іс-шараны өткізуде белсенділік танытатындықтарына сенім білдіремін.
