Тұрғындармен тығыз байланыс орнату түйінді мәселелерді шешудің бірден – бір жолы. Олардың мұң – мұқтаждарына құлақ асып, мәселелерін көзбен көріп, көңілге түю билік пен бұқара арасын жақындатып, тұрғындар проблемаларының тездетіп шешілуіне жол ашары анық. Шыны керек, шаһар болғаннан кейін ара – тұра жеделдете шешуді талап ететін мәселелер кездесіп тұрады. Осы ретте жуырда қала әкімі Ермак Сәлімов шаһардың шетіндегі Суық бастау, Комсомол кенттерінің тұрғындарымен жүзесті.
Күн жексенбі болса да, қала әкімінің Суық бастау кентінің мәселелерімен танысуға арнайы келетінін естіген тұрғындардың «тілегіміз жерде қалмайтын болды» деген қуанышы басым еді. Суық бастау кентінде Ермак Бидахметұлы ең алдымен жаңадан салынып жатқан кәріз желісінің құрылысымен танысты. Бүгінде ол жерде жаңадан екі резервуар орнатылуда. Оның бірінің құрылыс жұмыстары аяқталса, екіншісінде жалғасуда. Дегенмен ол жердегі кәріз суы жиналатын орыннан ақау шыққан. Қазір оны қайта қалпына келтіру жұмыстары жүруде. Жаңа қос нысан аталмыш ауданда тұрғызылатын жаңа үйлерге арнайы салынған көрінеді. Алайда кенттегі бұрыннан тұрғын жиырма шақты қос қабатты үйлерді осы жаңа жүйеге қосу көзделіп отырған көрінеді. Өйткені мұндағы қолданыстағы кәріз жүйесінің әбден тозығы жеткен екен. Ал жаңа кәріз жүйесіне қосу мәселесі уақыт еншісінде.
{jcomments on}Шаһар басшысы кентіндегі тозығы жеткен кәріз желісін да көрді. Кезінде Семейдің ет комбинатының арналып салынған тұрғын үйлердің кәріз суын арнайы техникалар тазартып отырған екен. Қазірде кәріз суын арнайы техникалармен тазарту жүйесі жұмыс жасап тұр. Алайда су жиналатын арнайы орынның кішкене болуы тұрғындар үшін үлкен мәселеге айналып отыр. Салдарынан күннің ыстығында қолқаны қабатын жағымсыз иіс терезені ашуға да мүмкіндік бермейді екен. Мәселенің мән-жайымен жан-жақты танысқан шаһар басшысы жиыналған кәріз суын уақытылы тазартып, істен шыққан ескі желілерді қайта қалпына келтіру үшін қалалық ТҮКШ және құрылыс бөліміне арнайы тапсырмалар жүктеді. Сондай-ақ су жиналатын шұңқырды да кеңейту мәселесіне мән беру керектігін атап өтті.
Қала әкіміне аталмыш кенттегі жылдар бойы қордаланып қалған өзге де бірқатар мәселелер мәлім болды. Тұрғындардың айтуынша, ең алдымен мұндағы санитарлық тазалық көңіл көншітпейді. Арнайы қоқыс жинайтын мекемемен келісімшарттары жоқ тұрғындар тұрмыстық қалдықтарын кез келген жерге тастап кете береді. Ермак Бидахметұлы кез-келген кенттің тазалығы, санитарлық жағдайы тұрғындардың өз қолдарында екенін атап өтті. Бұл ретте ауызбіршілік танытып, арнайы қоқыс тасымалдаумен айналысатын мекемемен келісімшартқа отырып, тұрмыс қалдықтарына арналған орындар орнату керектігін баса айтты.
Жалпы Ермак Бидахметұлы қала тұрғындарын жеке мәселелерімен жиі қабылдайды. Бұл күнде қала әкімінің қабылдауына келгендер жеке бастың емес, өзі тұратын ықшам ауданның, кенттің ортақ мәселесін жеткізіп, оны шешу жолында көмек сұрай келеді. Міне, қала шетіндегі Комсомол кентінің тұрғындары да жарық, жол сияқты жылдар бойы жиналып қалған мәселелерін әкім қабылдауында жеткізген еді. Тұрғындардың тілегін тыңдай отырып, қала әкімі Суық бастау кентінен шығып, Комсомол кентіне де келді.
Әуежайға сапарласаңыз оң жақтағы ретсіз салынған жер үйлердің еріксіз көңіліңізді аударатын анық. Ауылдан келген ағайынның жер мәселесін реттегеннен кейін, жарығы мен ауыз суының бір жөні болар деп құрылысқа бел шеше кірісіп кететін жасырын емес. Әлбетте, баспаналарын ретсіз салынғаннан кейін жарықтың да, ауыз судың да мәселесі туындайды. Қазір мұнда жарық мәселесі қиындау. Қолдан келгенше өздері бақан орнатып, жарықты есептегін құралынсыз көрші – қолаңнан тартып отыр. Ол үшін айына бес мың теңгесін жарық тартқан көршісіне ұстады екен. Тұрғындар қала әкіміне өздері бірлесе бірнеше баған алуға дайын екенін, тек жарық тартуға көмек қолын созуды сұрады. Сонымен қатар ауыз су мәселесі мен әуежайға шығатын аралыққа дейінгі ойдым жолды тегістеу төңірегінде де тұрғындар шаһар басшысына қол ұшын созатынына үмітті екенін жеткізді. Жылдар бойы жинақталған мәселелермен танысқан Ермак Бидахметұлы тұрғындардан кенттен көпшіліктің ортақ шешімімен арнайы өкілдерін сайлау керектігін, сайланған өкілдің дүйсенбі күні осы мәселе бойынша өтетін жиналысқа қатысатынын жеткізді.
Әкімнің жексенбі күнгі жұмысы Интернационал көшесіндегі бірқатар көпқабатты тұрғын үйлердің жылыту маусымына әзірлігіментанысумен жалғасты. Өткен жылғы жылыту маусымында мұндағы бірқатар үйлерде жылу мөлшері аз болыпты. Тұрғындардың жылуға берешектері жоқ. Дегенмен үйлерінде мардымды жылу берілмеген екен.
Мәселенің мән-жайын түсіндірген энергетиктер аталмыш үйлердің жылу пунктіне қарайтын ең соңғы нысандар екенін, салдарынан соңғы жылу желісіне судың көлемі дұрыс жетпегенін жеткізді. Алайда биылғы жылы бұл көп қабатты баспаналар қуаты жоғары магистральді желіге қосылыпты. Ал бұл өз кезегінде жылу көлемін жеткілікті беруге мүмкіндік береді.
Айта кету керек, қала әкімі дүйсенбі күні Суық бастау, Комсомол кенттеріндегі мәселелер бойынша арнайы жиын өткізіп, қалалық ТҮКШ, құрылыс бөлімдерімен оны шешу жолындарын талқылай отырып, бірқатар тапсырмалар жүктеді.
Асан МЫРЗАХАНОВ, «Семей таңы»
