Бүгінгі таңда, әлемдегі қалыптасқан жалпы ахуал тәрізді, діни экстремизм мен терроризмге қарсы күрес Қазақстан қоғамы үшін маңызды мәселелердің біріне айналды. Көпұлтты және көпконфессиялы ел үшін ұлтаралық және конфессияаралық татулықты сақтау, ішкі тұрақтылықты бекем ету — ең басты міндет. Соның аясында елімізде 2013-2017 жылдарға арналған діни экстремизм және терроризмге қарсы іс-қимыл жөніндегі мемлекеттік бағдарлама қабылданды. Бағдарламаның негізгі мақсаты діни экстремизм белгілерінің алдын алу және терроризм қаупіне жол бермеу арқылы адамның, мемлекеттің қауіпсіздігін қамтамасыз ету болып табылады.
{jcomments on}Осы ретте бүгінгі таңда Семей қаласы әкімдігінің жанынан құрылған антитеррорлық комиссия жүйелі жұмыс жүргізуде. Аптаның сейсенбісінде аталмыш топ өкілдерінің отырысы болып өтті. Басқосуды комиссия жетекшісі, қала әкімі Ермак Сәлімов алғы сөзбен ашып, жүргізіп отырды.
Жиынның негізгі тақырыбы 2013-2017 жылдарға арналған діни экстремизм және терроризмге қарсы іс-қимыл жөніндегі мемлекеттік бағдарлама аясындағы атқарылып жатқан жұмыстар барысын пысықтау болды. Баяндама жасаған қалалық білім бөлімінің басшысы Н.Фесенко, дене шынықтыру және спорт бөлімінің басшысы М.Құржықаев, сондай-ақ мәдениет және тілдерді дамыту бөлімінің басшысы Б.Көпбаевтар аталмыш бағыттағы қолға алынған шараларға тоқталды. Діни экстремизм мен радикализмнің алдын алу, террористік теріс пиғылдың қалыптаспауы мақсатында қаламыз бойынша бірқатар іс-шаралар жүргізіліп жатыр. Оның ішінде бірінші кезекте үгіт-насихат жұмыстарына мән берілуде. Яғни, қазақстандық патриотизмді дамыта отырып, отаншыл ұрпақ тәрбиелеу бағытындағы әрекеттер нәтижелі жүзеге асуда.
Жиын барысында баяндама жасағандар айтып өткендей, діни экстремизм мен терроризм әрекетіне қарсы тұрып, радикалды идеялар мен террорлық әрекеттерге қарсы иммунитет қалыптастырудың ең негізгі құралы — профилактикалық іс-шаралар жүргізу. Бұл ретте қала әкімі Ермак Бидахметұлы да ортақ пікір қосты. Шаһар басшысы айтып өткендей, радикалды сипаттағы діни ағымдардан жастарды арашалау, теріс пиғылды діни ағымдардан келетін қауіп-қатерді халық арасында кеңінен түсіндіру тұрақты түрде жүргізілуі тиіс. Өйткені экстремистік идеялар халықты өзінің ертеден келе жат-қан бай рухани құндылықтары мен салт-дәстүрінен бас тартқыза отырып, оның мәдени, тарихи, рухани санасын жойып жіберуді көздейді. Мұндай идеология, кез келген мемлекет секілді, Қазақстан қоғамының да ішкі тұрақтылығына елеулі қатер төндіреді. Осы орайдан алғанда, қаламыздағы атқарылған шаралар қатары біршама ауқымды. Сол себепті де жалпы діни ахуал қалыпты. Бұл бағыттағы шаралар алдағы уақытта да еліміздің, Семей өңірі тұрғындарының бейбіт өмірі үшін, ішкі тұрақтылықты қамтамасыз ету мақсатында тұрақты түрде жүргізіле бермек.
Қуаныш ЖОЛЫМБЕТ,
«Семей таңы»
