Апта сейсенбісінде Абай атындағы қазақ музыкалы-драма театрында Қазақ инновациялық гуманитарлық-заң университетінің «Ұлы даланың ұландары» атты І курстарды студенттер қатарына қабылдау рәсімі өтті. Салтанатты шараға қала әкімі Ермак Сәлімов бастаған жергілікті билік өкілдері, зиялы қауым және оқытушылар мен студент жастар қатысты.
{jcomments on}Салтанатты шара барысында сахна төріне көтерілген қала әкімі Ермак Сәлімов жалынды жастарға жылы лебізін білдірді.
— Жастарды білім нәрімен сусындатып, үлкен өмірге жолдама беретін өңірдегі іргелі оқу орнының І курстарды студенттер қатарына қабылдау мерекесі құтты болсын. Мектепті кеше ғана аяқтаған оқушылар бүгінгі күнде студент атанып, білімдерін шыңдау үстінде. Білім ордасының студенттері тек биіктен ғана көрініп, болашақта үлкен мамандық иелері болуларына тілектестік білдіреміз. Құрметті студенттер! Болашақтарыңыз баянды, даму жолдарыңыз нұрлы болсын, — деген Ермак Сәлімов аталмыш білім ордасының ұжымына шығармашылық табыс тілеп, ҚазИГЗУ ректоры Шырын Құрманбаеваға «Қазақстан Республикасы Конституциясына – 20 жыл» мерекелік медалін салтанатты түрде табыс етті.
Қазақ инновациялық гуманитарлық-заң университетінің ректоры Шырын Құрманбаева қала басшысына мерекелік шараға арнайы келіп, жастармен жүздескені үшін профессор-оқытушылар мен студенттердің атынан зор ризашылығын білдірді.
— Қазақ инновациялық гуманитарлық-заң университеті еліміз бойынша үздік 50 жоғары оқу орнының қатарына енген. Жастардың жоғары сапалы білім алуы үшін университетте барлық мүмкіндіктер жасалған. Жоғары білікті профессор-оқытушылар қызмет ететін білім ордасында жетілген инфрақұрылым, әскери кафедра, спорт кешендері, демалыс базалары жұмыс істейді. Көлемі 2 гектарға жуық жерге орналасқан әскери кафедра бүгінде облыстық деңгейдегі әскери патриоттық тәрбие беру орталығы болып отыр. Ал университеттің бас ғимараты республикалық деңгейдегі түрлі бас қосулардың мәдени ордасына айналды. Жалындап тұрған жастар үшін жастар саясаты ұйымы орталығы да бар. Мұнда үздік оқумен қатар, ерекше қабілеттерін таныта білген белсенді студенттерге түрлі гранттар мен стипендиялар бөлу арқылы біз әрдайым студенттерімізді қолдаймыз, — деген Шырын Асылханқызы сөз соңында жалынды жастарға ақ жол тіледі.
Шара барысында мемлекеттік грант иегері Әсел Әскербекқызы мен ректор грантының иегері Мейрамбек Жұмағалиевке арнайы символдық нышандар берілді. Сондай-ақ Қазақ күресінен халықаралық дәрежедегі спорт шебері, дзюдо күресінен спорт шебері, қазақ күресінен әлем чемпионы Айдос Сейпілұлы мен әскери самбодан Қазақстан Республикасының спорт шебері, кудодан спорт шеберлігіне үміткер, әлем чемпионатының қатысушысы, Азия чемпионатының қола медаль иегері Құрмет Бақытбекұлы сынды университет мақтанышына айналған бірқатар оқытушылар арнайы грамоталармен және қаржылай сыйлықтармен марапатталды.
Қолданбалы биология кафедрасының меңгерушісі, биология ғылымдарының кандидаты, доцент Айнұр Қыдырмолдина және басқа да бірқатар оқытушылар өз кезектерінде мінберге шығып, студенттерге деген жылы ле-біздерін білдірді.
Мерекелік шара барысында әуелеген ән де шырқалып, мың бұралған би де биленді. Студент жастардың ұйымдастыруымен Қазақ хандығының 550 жылдығы мен Жеңістің 70 жылдығы сияқты биылғы мерейлі мерекелерге арналған театрландырылған көріністер де қойылды.
Нұрдәулет КӘКІШЕВ,
«Семей таңы»
