Семейдің Орталық алаңында қысқы киім үлгісіне өтуге байланысты ІІБ жеке құрамының саптық байқауы өтіп, шара барысында ішкі істер органдарының жас қызметкерлері салтанатты түрде ант қабылдады.
Биыл Семей қаласы ішкі істер басқармасының құрамы тағы да 14 полицеймен толықты. Салтанатты түрде ант қабылдағандар жол-патрульдік қызмет пен жедел басқару орталығында және Орталық полиция бөлімі мен ақпараттық-сараптама бөлімінде қызмет ететін болады. Салтанатты шарада сөз алған қалалық ішкі саясат бөлімінің басшысы Айдар Садырбаев ант қабылдаған жас полицейлерді құттықтап, өзінің жылы лебізін білдірді.
{jcomments on}- Құрметті ішкі істер органдарының қызметкерлері! Сіздерді салтанатты ант қабылдау рәсімімен құттықтаймын. Сіздердің күнделікті тынымсыз еңбектеріңіздің арқасында Семей қаласы мен қала маңындағы ауылдық округтердегі қоғамдық тәртіп, ішкі саяси тұрақтылық, қоғамдық саяси ахуал тұрақтылығы жіті назарда. Мысалы, қылмыс деңгейінің төмендеуі, қала қоғамындағы тәртіптілік деңгейінің артуы сіздердің күнделікті тынымсыз еңбектеріңіздің жемісі деп білеміз. Барлықтарыңызға мықты денсаулық, анттарыңызға берікті, істеріңізге сәттілік тілеймін, — деді өз сөзінде А.Садырбаев.
Одан кейін сөз алған ішкі істер органының ардагері, отставкадағы полковник Юрий Квашнин, №5511 әскери бөлімі ардагерлер кеңесінің төрағасы Сабыр Таймасов, сондай-ақ ант қабылдаушылардың ата-аналары жас полицейлерді құттықтап, еңбектеріне жеміс тіледі. Ардагерлер жас мамандардың өздеріне жүктелген міндеттерді адал атқаратындықтарына зор сенім білдіріп, Отан алдында, заң алдында аянбай еңбек етуге тілектес екендіктерін жеткізді. Қызмет барысында кездесетін түрлі қиындықтарға мойымай, төзе білуге, қырағы болуға шақырды. Көпшіліктің алдында ант қабылдаған жас полицейлер де азаматтардың құқығын қорғауға, қала тыныштығын сақтауға әрқашанда дайын екендіктерін жеткізді. Салтанатты жиын оркестрдің сүйемелдеуімен жеке құрамның шеруімен аяқталды.
Асан МЫРЗАХАНОВ, «Семей таңы»
