«Нұр Отан» партиясының Семей қалалық филиалының қоғамдық қабылдау бөлмесінде тұрғын үй мәселелері бойынша ашық кеңес беру форматында «Азаматтарды бірыңғай қабылдау күні» акциясы ұйымдастырылды. Аталмыш сауал бойынша шараға қалалықтар көп жиналды.
Бұл акция аясында азаматтарға Семей қалалық әкімдігінің тұрғын үй коммуналдық шаруашылық, жолаушылар көлігі және автомобиль жолдары бөлімінің, «Қазақстанның тұрғынүй құрылыс жинақ банкі» АҚ Семей қалалық филиалының, қалалық тұрғын үй инспекциясының, сондай-ақ жұмыспен қамту және әлеуметтік бағдарламалар бөлімінің мамандары қабылдауға жазылған қалалықтарға тұрғын үй мәселелері бойынша жан-жақты әрі тұщымды кеңес берді.
Баспана мәселесі бүгінгі таңда күн тақырыбында тұр. Мемлекеттік бағдарламалар аясында біртіндеп шешімін тауып келе жат-қанымен әлі де болса үйге қол жеткізудің жөн-жосығын білмей жүрген тұрғындар бар. Ал оларға заңдылық тұрғыдан көмек беру, ақпараттандыру ісі бірінші кезекте тұр. Сондай жандардың бірқатары осы күні қоғамдық қабылдауға арнайы келіп, сала мамандарынан ақыл-кеңес алды.
{jcomments on}Мәселен, қаламыздың «8 шақырым» ауданынан келген әжей жапсарлас тұратын, ішімдікке салынған көршілерінің кесірінен үйінің өртеніп кеткенін айтады. Бас көтерер азаматтары жоқ, шаңырақсыз қалған жанұя баспанаға қол жеткізудің жолдарын қарастырып, кеңес сұрай келіпті. Көпбалалы анаға кесімді түрдегі көмек болмағанмен, үй алудың өзге жолдарын қарастыру ұсынылды.
Баспана алудың ретін сұрастырып келгендердің бірі — колледж студенті, балалар үйінің түлегі Әсемгүл болды. Туыстары үйінен шығарып жіберген 20 жасар қыз бүгінде жатақханадан бөлме жалдап тұрып жатыр екен. Оған кеңес берген мамандар тұрғынүй жинақ банкі салымшысы болуы себепті баспанаға қол жеткізудің мүмкіндігі жоғары екендігін айтты. Балалар үйінде жүрген кезінде де жергілікті кәсіпкерлер оның есепшотына әжептәуір сома аударған. Қазіргі күні ол аталмыш банктегі есепшотына айына он мың теңгеден құйып отырады. Тағы бір өзекті мәселе — оқу орнын тәмамдағаннан соң берілетін жәрдемақы да тоқтайды екен. Осы жайында мамандардан кеңес сұраған Әсемгүл әлі де өз күшімен еңбектеніп, қордағы қаражатын арттыра беруге белін бекем буды.
Бұл күні әсіресе «Қазақстанның тұрғынүй құрылыс жинақ банкі» АҚ Семей қалалық филиалы директорының орынбасары Еркежан Омарғалиевадан кеңес сұраушылар көп болды. Себебі, қазіргі күні аталмыш банктің есебінен қаламыздағы Қашаубаев көшесі бойынан 36 пәтерлік көпқабатты үй бой көтеруде. Көпшілік семейліктер жайлы ауданда орналасқан аталмыш нысаннан пәтер алғысы келеді екен. Сонымен қатар, салымшылар қордағы өз қаражаттарының компенсациясы туралы да сұрай келіпті. Бұл жөнінде жауап берген маман қазіргі күні заңнама ел үкіметі тарапынан қаралып жатқанын жеткізді. Жалпы, бүгінгі таңда аталмыш банктің Семей қаласы бойынша 15 мыңнан астам салымшысы бар екен. Тұрғындарды баспанамен қамтуда жетістікті еңбек жолын айтып өткен Еркежан Омарғалиева қорға қаражат құюда семейліктердің белсенділігі жоғары екенін жеткізді.
Қуаныш ЖОЛЫМБЕТ,
«Семей таңы»
