Ерлік ешқашан ұмытылмайды. Отанын қорғап, қан майданда қасық қаны қалғанша жаумен айқас-қан кешегі жауынгерлердің ерлігі — ұрпаққа үлгі. Ерліктің ерен үлгісін көрсетіп, ұрыс даласында жанқиярлықпен қаза тапқан жауынгер ерлігі ешқашан да ескерусіз қалмайды. Ерліктің ұмытылмағанын айғақтайтын сәт өткен аптада Семей қалалық әкімдігінде орын алды. Майдан даласында қаза тапқан семейлік жауынгер Абдулла Шамсутдиновке табысталмай қалған «Ерлігі үшін» медалі және 2 дәрежелі «Отан соғысы» ордені ұрпақтарына салтанатты түрде табыс етілді. Ер есімін ел есінде сақтайтын айтулы шараға Семей қаласының әкімі Ермак Сәлімов, қалалық мәслихат хатшысы Бейсенбек Ақжалов және Шығыс Қазақстан облысындағы Ресейдің Бас консулы Сергей Анненков арнайы қатысты.
Жауынгер Абдулла Шамсутдинов 1913 жылы Семей қаласында дүниеге келген. Сұрапыл соғыс басталған 1941 жылы алғашқылардың қатарында қолына қару алып, әскери комиссариаттан ефрейтор шенімен майданға аттанады. Майдан даласында Абдулла Шамсутдинов 220-шы гвардиялық атқыштар полкінің 216-шы жеке байланыс ротасының құрамында болады. Соғыс аяқталуға бірнеше ай қалғанда, яғни 1945 жылдың 6 ақпанында майдан даласындағы қиян – кескі ұрыста Абдулла Шамсутдинов жаудан байланыс желісін қорғау кезінде ерлікпен қаза табады.
{jcomments on}Міне, Жеңістің 70 жылдығы аясында Қазақстан және Ресейдің бірлескен іс – әрекеті нәтижесінде белгісіз себептермен тапсырылмай қалған майдангердің марапаттары ұлы Марат Шамсутдиновке табысталды. Абдулла Шамсутдиновтің «Ерлігі үшін» медалі мен 2 дәрежелі «Отан соғысы» орденін Ресейдің ШҚО-ғы Бас консулы Сергей Анненков ресми түрде табыс етіп, өзінің жылы лебізін де білдірді. Сергей Анненков жауынгердің әулетіне әкелерінің есімін ардақтап, ерлігін ұмыт қалдырмай, кейінгі ұрпақ үлгі алатын іс тындыр-ғанына ризашылығын да білдірді.
— Жеңістің 70 жылдығына орай Ресей мен Қазақстан арасында көптеген нәтижелі жұмыстар атқарылды. Атап айтқанда, майдан даласында қаза болған белгісіз жауынгерлерді іздестіру ісінде, көптеген майдангерлердің ерліктерінің ескерусіз қалмауы жолында ауқымды іс тындырылды. Әлбетте, бұл — ортақ жеңіс. Міне, бүгін мен Отан қорғауда ерлік-пен қаза тапқан Абдулла Шамсутдиновтің ұлы Марат Абдуллаұлына 2-ші дәрежелі «Отан соғысы» ордені мен «Ерлігі үшін» медалін табыстадым. Біз – ерлікті жадымыздан шығармауға тиіспіз. Мұндай көңіл толқытар сәтті аға ұрпақ алдындағы аманат деп қабылдағынымыз жөн, — деп атап өтті Сергей Викторович.
Жиналғандардың алдында сөз алған қала әкімі Ермак Бидахметұлы ресейлік әріптестеріне алғысын жеткізіп, қос елдің ынтымақтастығын нығайтатын осындай игі шаралар одан әрі жалғасатындығына сенім білдірді.
— Құрметті жерлестер және қымбатты қонақтар! Бүгін біз қуанышты жағдайда жиналып отырмыз. Соғысқа Семейден көптеген жерлестеріміздің ел қорғауға аттанғаны белгілі. Қаншасы туған еліне оралмай, ұрыс даласында қаза тапты. Елге оралмай, майдан даласында қаза тапқан жауынгердің бірі — жерлесіміз Абдулла Зиянышұлы Шамсутдинов. Араға 70 жыл салып жерлес жауынгердің ерлігі лайықты бағасын алып отыр. Ол — қуантарлық жаңалық. Оның атын өшірмеуге күш салған туған-туыстарына алғысымызды білдіреміз. Осы бағыттағы жұмыстар алдағы уақытта өзінің жалғасын тауып, қос елдің байланысы нығая түседі деген ойдамын, — деді қала әкімі Ермак Бидахметұлы.
Жақсылық МҰРАТҚАЛИ,
«Семей таңы»
