Қала әкімі Ермак Сәлімов өзінің жұмыс кабинетінде 16-17 қазан күндері Ресейдің Екатеринбург қаласында пауэрлифтинг спорт түрінен өткен Әлем чемпионатында жеңіске жеткен семейлік спортшыларды қабылдады. Жиынға сонымен қатар қалалық денешынықтыру және спорт бөлімінің басшысы Мұрат Құржықаев пен жаттықтырушы, «GOLD KING» спорт клубының директоры Андрей Алтайбаев қатысты.
Андрей Алтайбаевтың айтуынша, Екатеринбург қаласында өткен чемпионатта 4500 спортшы бақтарын сынаған. Сайыпқырандар сайысын 10 мыңға жуық көрермен тамашалапты.
Осы әлемдік чемпионатта бақ сынаған семейлік 4 спортшы да олжалы оралған. Ересектер арасында сынға түскен Владимир Фольман мен Виктор Пряхин және ардагерлер арасында Александр Торпыныч чемпион атанып, алтыннан алқа тақса, жастар арасында Закир Найманбаев күміс медальға қол жеткізген.
Саңлақтарды жеңісімен құттықтаған қала басшысы спортшылардан әлемдік чемпионат жайлы сұрады. Кіл мықтылардың арасында оза шауып, елге олжалы оралған ауыр атлеттер чемпионаттан алған әсерлерімен бөлісті. 220 келілік зілтемірді көтеріп, чемпион атанған Виктор Пряхин әлемдік рекорд жаңартпақ болған екен.
— Қазіргі әлемдік рекорд 240 келіні құрайды екен. Мен 242,5 келіні көтеріп, әлемдік рекорд жаңартпақ болғанмын. Алайда біраз сәтсіздік болып, бұл ойым әзірге жүзеге аспады. Бірақ өкінетін ештеңе жоқ. Сәтін салса, 2016 жылы АҚШ-та өтетін Әлем чемпионатында осы ойды жүзеге асыруға мүмкіндік бар. Еліміздің намысын абыроймен қорғау үшін дайындығымды күшейтіп, барымды салатын боламын,- деді Виктор Пряхин өз сөзінде.
Спортшылармен кездесу барысында Ермак Бидахметұлы Андрей Алтайбаевтан қалада өткізетін жарыстары мен жалпы жоспарлары жайлы сұрады. Қала басшысына спорт саласының дамуына қолдау көрсетіп жүргені үшін зор ризашылығын білдірген Андрей Алтайбаев қалалық әкімдіктің қолдауының нәтижесінде пауэрлифтинг спорт түрінің қаламызда қарқынды дамып келе жатқанын, бұл спорт түрінен қала және облыс бойынша жастар мен ардагерлер арасында жетістікке жетіп жүргендердің аз емес екенін тілге тиек етті. Сонымен қатар қаламыздан Қазақстанның рекордын жаңартушылар мен Азия және Әлем чемпиондарының көптеп шығып жатқанын, уақыт өткен сайын осы спорт түрімен айналысушылардың қатары да арта түскенін атап өткен Андрей Алтайбаев «GOLD KING» спорт клубының кеңейтіліп, үлкен залдың салынғанын, алдағы уақытта сол жерде қалалық ашық чемпионат өткізуді жоспарлап отырғанын, оған барлық ниет білдіруші ауыр атлеттердің қатысуға мүмкіндіктері бар екенін жеткізді.
— Дені сау адам сергек жүреді, ойындағысын жүзеге асыруына мүмкіндігі болады. Ал денің сау болу үшін және салауатты өмір сүру үшін спортпен айналысу керек, — деген Ермак Сәлімов ауыр атлеттерге аталмыш спорт түрін қаладағы алаңдарда, театр сахнасында және мектептер мен балалар үйіне арнайы барып шоу түрінде көрсетіп, насихаттауды ұсынды.
Бұл тұрғыда нәтижелі жұмыстардың жүргізіліп жатқанын, шоу көрсетіп, осы спорт түрін насихаттау жоспарларында бар екенін айтқан Андрей Алтайбаев қазіргі уақытта спортпен айналысуға ынталы жастардың көп екенін, сонымен қатар «GOLD KING» спорт клубына жаттығуға мүмкіндігі шектеулі жандардың да көптеп, келетінін айтып өтті.
Кездесу барысында спортшылардың ұсыныс-тілектерін тыңдаған қала басшысы саңлақтардың алдағы жарыстарына да сәттілік тіледі.
Нұрдәулет КӘКІШЕВ, «Семей таңы»
