15 – 18 қазан күндері Алматы қаласында Қазақ хандығының 550 жылдығына арналған әскерге дейінгі жастар арасында әскери қолданбалы спорт түрлерінен республикалық турнир болып өтті. Сайыстың мақсаты жастарды патриотизмге тәрбиелеу, салауатты өмір салтын ұстанып, спортпен шұғылдануға шақыру еді. Алатаудың бөктерінде өткен сайыста ШҚО – ның намысын қорғаған семейлік жастар жоғары нәтижеге қол жеткізіп, командалық есепте екінші орынды иеленген-ді. Бұл туралы Семей қалалық ақпараттық орталығында арнайы ұйымдастырылған баспасөз мәслихатында мәлім болды.
{jcomments on}Баспасөз мәслихатына Семей қаласы денешынықтыру және спорт бөлімінің бас маманы Қуат Исажанов, әскери-спорттық клубтар федерациясының Семей қаласындағы филиалының төрағасы Серік Түсіпов, Семей қаласы құрамасының қоян-қолтық ұрыстан жаттықтырушысы Владимир Мельницкий және жүлдегер спортшылар қа-тысты. Сайыс Алматы қаласындағы орталық әскери спорт клубының базасында ұйымдастырылыпты. Аталмыш турнирге еліміздің 7 облысынан 12 команда қатысуға ниет білдірген. Жарыс қорытындысына сәйкес — Шығыс Қазақстан облысының атынан сынға түскен семейлік өрендер тек Ақтөбе облысына ғана есе жіберген. Тартысты бәсекелер барысында сайыскерлер кешенді жекпе-жек, әскери кросс және тапаншадан ату бойынша өзара мықтыларды анықтапты. Қоян-қолтық ұрыс жаттықтырушысы В.Мельницкийдің айтуынша, семейлік жастардың осындай жарыста топ жаруы оңайға түспеген. Себебі оларға қарсы тұрған спортшылардың дені аралас жекпе-жек түрлерінен шыңдалған кәнігі кәсіби спортшылар болыпты.
— Турнирге дайындық шараларын 2 ай көлемінде жүргіздік. Ең алдымен шәкірттеріміз облыстық жарыста үздік атанды. Ал Алматы қаласындағы кешенді жекпе-жек өте ерекше форматта өткізілді. Алғашқы раундта қатысушылар кикбоксингтің ережесі шеңберінде қолғап түйістірді. Екінші раундта еркін күрестің қағидалары бойынша белдесуге тура келді. Ақтөбеліктердің жақсы дайындықпен келгені бірден аңғарылып тұрды. Мәселен, ұрысқа олардан ММА сынды аралас жекпе-жек өнерімен айналасып жүрген халықаралық деңгейдегі сайыскерлері шықты. Соған қарамастан шәкірттеріміз лайықты қарсылас атанды. Осындай республикалық турнирге біздің спортшылар алғаш рет қатысып отыр. Осының өзінде командалық есепте 2 орыннан көріне білді. Бұл біздің команда үшін жаман нәтиже емес. Алайда біз бұл межемен тоқтап қалмақ емеспіз. Жіберген барлық олқылықтарымызды ескеріп, келер жылғы бәсекеге тас-түйіндей дайын болу үшін, жаттығуларымызды еселей түсетін боламыз, — деп атап өтті білікті бапкер В. Мельницкий.
Кешенді жекпе-жекте мерейі үстем болған жерлесіміздің бірі 50 келіге дейінгі салмақта бақ сынаған Ильяс Қабидолдин. Ол сайыста барлығы 3 кездесу өткізіпті. Қарсыластарының атақ – дәрежесінен жүрексінбеген Ильяс өзінің мықтылығын қарсыластарына да мойындата білді. Жалпы жерлестеріміз осы турнирде 2 алтын, 3 күміс және 3 қола медальды қоржынымызға салыпты.
Ж.СҮЛЕЙМЕН,
«Семей таңы»
