Апта сәрсенбісінде «Нұр Отан» партиясы Семей қалалық филиалының мәжіліс залында партия жанындағы жемқорлықпен күрес жөніндегі қоғамдық кеңестің кезекті отырысы өткізілді.
«Нұр Отан» партиясы Семей қалалық филиалы жанындағы жемқорлықпен күрес жөніндегі қоғамдық кеңестің төрағасы, облыстық мәслихат депутаты Ғаббас Ибраевтың жетекшілік етуімен өткен жиын-ға жергілікті билік өкілдері, ШҚО кәсіпкерлер палатасының Семей қаласы филиалының директоры Ардақ Әділжанов, қалалық Достық үйінің директоры Аман Тілеубаев және бірқатар кеңес мүшелері қа-тысты. Жиын барысында алғашқы болып сөз алған қалалық ТҮКШ, жолаушылар тасымалы және автокөлік жолдары бөлімі басшысының орынбасары Жексенғазы Қалдыбаев «Нұрлы жол» мемлекеттік бағдарламасы аясында «ТҮКШ, су және жылумен қамту жүйелерін жаңғырту» бағыты бойынша атқарылған жұмыстар жөнінде баяндады. Оның сөзіне сүйенсек, осы мақсатқа республикалық қазынадан қомақты қаржы бөлінген. Ол қаражат 2015-2016 жылдары толық игерілуі тиіс екен. Бағдарлама негізінде ағымдағы жылдың 25 тамызынан бастап Семейде 10 жобаны жүзеге асыру бойынша жұмыстар қолға алыныпты. Бұған қоса, 4 жылу қазандығы қайта жаңғыртудан өтіп жатқандығын айтқан Жексенғазы Мырзағазыұлы, сондай-ақ жылу желілерін жаңғырту бойынша жоспарланған 35 312 метрдің 16 808 метріне жөндеу жұмыстары толығымен аяқталғандығын жеткізді. Ғаббас Төкешұлы жауапты маманнан шаһардағы тұрғын үйлердің қысқы маусымға қаншалықты дайын екендігін сұрады. Бұл ретте Ж.Қалдыбаев, барлық әлеуметтік маңызы бар нысандар мен көпқабатты пәтерлер жылуға дер кезінде қосылғанын, жылу науқаны жоспарлы түрде өтіп жатқанын айтып өтті. Сонымен қатар қоғамдық кеңес мүшелері ТҮКШ, жолаушылары тасымалы және автокөлік жолдары бөлімінің басшысының орынбасарынан қала көшелерінің жарықтандыруы жайлы сұрады.
— Түнгі уақытта қаланың ішкі көшелеріндегі жарық сөніп қалады. Ал әуежай бағыты мен Павлодар қаласына бағытталған қала сыртындағы жолдардың жарығы түнгі 2-ден кейін де қосылып тұрады. Осыны бақылауға алып, ретке келтірулеріңізді сұраймыз,- деп Ғ.Ибраев жауапты маманға ұсынысын білдірді.
Жалпы, отырыс барысында сыбайлас жемқорлықтың алдын алуға бағытталған жұмыстар тұрғысындағы 4 мәселе қаралды. Жиын соңында кеңес мүшелері жолданған кейбір сұрақтар бойынша толық жауап алу үшін жақын арада қайтадан жиналуға уағдаласты.
Ж. СҮЛЕЙМЕН,
«Семей таңы
