Семей қаласы мәслихатының кезектен тыс қырық бесінші сессиясы өтті. Бауыржан Қайрамбаевтың төрағалығымен өткен сессия жұмысына қала әкімі Ермак Сәлімов бастаған жергілікті билік өкілдері, облыстық мәслихат хатшысы Владимир Головатюк қатысты.
Сессия барысында алты мәселе, яғни Семей қаласы мәслихатының 2014 жылғы 23 желтоқсандағы № 36/191-V «Семей қаласының 2015-2017 жылдарға арналған бюджеті туралы» шешімге өзгерістер мен толықтырулар енгізу туралы, Шығыс Қазақстан облысы Семей қаласы әкімдігінің құрамын бекіту туралы, Семей қаласы мәслихатының 2013 жылғы 24 желтоқсандағы № 26/135-V «Төтенше жағдайлардың алдын алу және жою жөніндегі қалалық комиссияның дербес құрамы туралы» шешіміне өзгерістер енгізу туралы, Семей қаласы мәслихатының 2014 жылғы 5 наурыздағы № 27/142-V «Наградалық істерді алдын ала қарау жөніндегі қалалық комиссияның дербес құрамы туралы» шешіміне өзгерістер енгізу туралы, қала әкімдігі жанындағы діни бірлестіктермен байланыс жөніндегі Кеңестің құрамын бекіту туралы және сайлау комиссияларының жекелеген мүшелерін міндеттерінен босату туралы мәселелері қаралды.
{jcomments on}Семей қаласы мәслихатының 2014 жылғы 23 желтоқсандағы № 36/191-V «Семей қаласының 2015-2017 жылдарға арналған бюджеті туралы» шешімге өзгерістер мен толықтырулар енгізу тұрғысында сөз алған қалалық экономика және бюджеттік жоспарлау бөлімінің басшысы Гүлжан Алтынбекова депутаттар тарапынан қойылған сауалдарға жауап берді.
Өз кезегінде қала әкімі аппаратының басшысы Зәуреш Исабаева 2-5 мәселелері бойынша мінберге шығып, халық қалаулыларын аталмыш сұрақтар жөніндегі ақпараттардан құлағдар етті.
Ал қалалық мәслихат хатшысы Бейсенбек Ақжалов сайлау комиссияларының жекелеген мүшелерінің міндеттерінен босатылғаны туралы айтты.
— Қалалық мәслихатқа сайлау комиссиялары мүшелері тарапынан отбасылық жағдайларына және денсаулықтарына байланысты, сол сияқты басқа қалаларға көшу себептері бойынша комиссия мүшелігінен босатылу туралы 163 өтініш келіп түсті. Оның 13-і округтік комиссия мүшелерінен болса, 150 өтініш учаскелік комиссия мүшелерінен. Сайлау комисиялары жекелеген мүшелерінің өтініштерін қарап, ҚР «Қазақстан Республикасындағы сайлау туралы» Конституциялық Заңының 10,19-баптарына, қалалық мәслихат Регламентінің 13-тарауына сәйкес, сайлау комиссияларының мүшелері міндеттерінен босатылсын, — деді Бейсенбек Ақжалов.
Мәслихат хатшысының ұсынысын депутаттар бір ауыздан қолдап, дауыс берді. Жалпы, қалалық мәслихат депутаттары барлық мәселелер бойынша бір ауыздан шешім шығарды.
Нұрдәулет КӘКІШЕВ,
«Семей таңы»
