Қыс маусымына дайындық тек жылуды жөнге келтірумен ғана шектелмейтіні анық. Қыста қалаішілік жолдарды дер кезінде тазалап, тұрғындар үшін қолайлы жағдай жасау да маңызды шаруа. Әлбетте, бұл ретте тазалық жұмыстарымен айналысатын мекемелер үшін тыңғылықты дайындық қажет. Осыған орай апта сәрсенбісінде Семей қаласының әкімі Ермак Сәлімов коммуналдық техикалардың қыс маусымына дайындығын арнайы тексерді.
Семей қалалық ТҮКШ, жолаушылар көлігі және автомобиль жолдары бөлімінінің мәліметіне сүйенсек, коммуналдық техникалар қысқы маусымға дайын. Биыл қала көшелерін тазартуға 100 – ге жуық техника жұмылдырылса, оның 80-ге жуығы тазалау жұмыстарына пайдаланылады. Айта кету керек, қысқы көше тазалау жұмыстары, негізінен, «Семей» көгалдандыру және көркейту мекемесіне тиесілі. Сондай-ақ қосалқы мердігер мекемелер «Гордор-строй» ЖШС, «Озон» ЖШС және «Баймағамбет» ЖШС де қыс мезгілінде қала көшелерін қардан тазалау жұмыстарына араласады.
Коммуналдық техникалардың қыс мезгіліне қаншалықты дайын екеніне көз жеткізу мақсатында қалалық ТҮКШ, жолаушылар көлігі және автомобиль жолдары бөлімі, жол – патрульдік полициясы және ТЖБ арнайы тексеріс жүргізген. Тексеріс нәтижесіне сәйкес, арнайы комиссия барлық қолда бар техникалардың жарамдылығын растап отыр. Сонымен қатар тұз ерітінділері мен көк тайғақтан қорғайтын құм да алдын ала жеткілікті мөлшерде дайындалған. Жүз рет естігеннен, бір рет көрген артық емес пе? Коммуналдық техникалардың дайындығын өзі қарап шыққан Ермак Бидахметұлы қысқы тазалық жұмыстарын жүргізетін жұмысшылармен жүздесті. Сонымен қатар тазалыққа жауапты мекеме басшылары өз жұмыстарын жүргізу кезінде жол жиегіндегі көліктердің айтарлықтай кедергі келтіретінін айтады. Осы ретте олар Семей қалалық ІІБ-мен аталған мәселені шешудің жолдарын қарастырып жатқанын да тілге тиек етті. Өз кезегінде қала әкімі техникалардың дайындығына көңілі толатынын жеткізді.
— Коммуналдық техникалардың қысқы маусымға дайындығымен танысып шықтым. Биыл қаланың орталық көшелерінің тазалығына баса назар аударатын боламыз. Сонымен қатар қоғамдық көліктер қатынайтын маңызы бар көшелерді де естен шығармаймыз. Қоғамдық көліктердің қиындықсыз қатынауына кедергі болмауы тиіс. Қысқы тазалық жұмыстарына жауапты мекемелер басшылары міндеттерін талапқа сай орындаймыз деп сендірді. Ендігісі уақыт еншісінде. Әлбетте, шаһардың шеткі аудандары да назардан тыс қалмайды. Қала шетінде тұратын тұрғындар тарапынан өтініштер келіп түсуде. Бұл орайда біз тек қана тазалыққа жауапты мекемелердің жұмысымен шектеліп қалмауымыз керек. Жекеменшік кәсіпорындардың қарамағында қаншама техника бар. Осы ретте жеке кәсіпорын техникаларын қысқы тазалық жұмыстарына тарту мақсатында тиісті мамандарға тапсырма жүктелді. Қысқы маусымда шаһар тазалығы қатаң қадағалауда болады, — деді Семей қаласының әкімі Ермак Сәлімов.
Жақсылық МҰРАТҚАЛИҰЛЫ,
«Семей таңы»
