Жастарды жат ағымдардың жетегінде кетуден сақтандыру— бүгінгі қоғамдағы өзекті мәселелердің бірі. Өткен жұмада халық арасындағы діни сауаттылықты арттырып, ақпараттық—насихат жұмыстарын жүргізуде өзара iс—қимылдарды жандандыру мақсатында дөңгелек үстел басқосуы болып өтті.
Семей қалалық ішкі саясат бөлімінің қолдауымен «Жанұя орталығы» қоғамдық қоры ұйымдастырған жиынға ішкі саясат бөлімінің басшысы Айдар Садырбаев, ҚМДБ-ның Семей өңіріндегі өкіл имамы Мақсат Алтыбай, «Жанұя орталығы» ҚҚ жетекшісі Людмила Асташкина, Ішкі істер бас-қармасының аға жедел уәкілі Мұрат Ажханов, «Әмина» қоғамдық ұйымының директоры Гүлжиһан Жұматаева қатысты. Жиында тұрғындарды діни тұрғыдан сауаттандыру, ақпараттық-насихат жұмыстарын жүзеге асыру сынды көптеген мәселелер ортаға салынып, пікір алмасылды. Дөңгелек үстелді алғы сөзбен ашқан ішкі саясат бөлімінің басшысы Айдар Садырбаев өңірдегі діни ахуалдың тұрақты болуы үшін және де дәстүрлі дініміздің дұрыс насихатталуы әрі қоғамдағы әртүрлі деструктивті діни ағымдармен күресу жолында бірігіп қызмет ету қажеттігін айтты.
— Осы мәселе бүгінде ішкі саясат бөлімі мен ішкі істер басқармасын не болмаса жеке заңды тұлғаларды ғана алаңдатып отырған жоқ. Аталмыш жайттың қоғамымызды алаңдатып отыр-ған жайы бар. Бұл жерде біз ескерер басты қағида — діни экстремизм және терроризммен күресті бір-бірімен шатастырып алмауымыз керек. Бұл — Елбасының қадап тұрып айтқан тапсырмасы. Осы міндетті лайықты орындау осы отырған сіздер мен бізге байланысты. Бүгінгі күні, жасыратыны жоқ, діни радикализмге қарсы үгіт-насихат жүргізу ісінде діни бірлестіктердің көмегіне жүгінеміз. Сол себепті де осы ұйымдармен тығыз байланыс орнатылған, — деді ішкі саясат бөлімінің басшысы Айдар Садырбаев.
Осыдан кейін қатысушылар діни экстремизм мен терроризмге қарсы іс-қимыл, дәстүрлі және дәстүрлі емес діни бірлестіктер жұмысы туралы өзара пікір алмасты. Сондай-ақ дөңгелек үстел барысында кереғар ағымдар туралы да айтылып, нақты мысалдар келтірілді. Жалпы, аталмыш топ алдағы уақытта көтерілген тақырып бойынша шаһарымызда ақпараттық-насихат жұмыстарын жиі жүргізбек.
Асан МЫРЗАХАНОВ,
«Семей таңы»
