Өткен аптада Семей қаласы Орталықтандырылған кітапхана жүйесінің Балалар және жасөспірімдер кітапханасында НұркенБектасовтың «Өмірге құштарлық» атты кеші өткізілді. Аталмыш кеште жерлесіміз, жас талант иесі Нұркеннің қазақ тіліндегі алғашқы ертегілер жинағының тұсауы кесілді.
Айтулы шараға Семей қаласы әкімінің орынбасары Надежда Шарова, қалалық ішкі саясат бөлімінің басшысы Айдар Садырбаев, сонымен қатар шаһардың зиялы қауым өкілдері, жоғары оқу орындарының ұстаздары мен белсенді жастар қатысты. Алғаш болып сөз алған қала әкімінің орынбасары Надежда Шарова мемлекеттік тілде өз құттықтауын жеткізді.
— Мүмкіндігі шектеулі жандардың толыққанды білім алып, ел қатарлы өмір сүруіне барлық жағдай жасау — қоғам алдындағы басты міндет. Бұл туралы Елбасымыз халыққа арнаған Жолдауында басымдық берген болатын. Мүмкіндігі шектеулі жандарға қол ұшын созып, көмек көрсету — біздің де басты мақсатымыз. Өз замандастарына ой салып жүрген білімді, зерек жас талант Нұркен Бектасов аударма ісін қолға алып, орыс тіліндегі әлем халықтарының ертегілерін қазақ тіліне аударды. Нұркенге талабыңа нұр жаусын деп, шығармашылық табыс тілейміз. Болашағыңнан зор үміт күтеміз, — деді Н.Шарова өз сөзінде.
Тағдыр арбаға таңғанымен, қаланың қоғамдық және мәдени шараларына белсенді түрде қатысатын Нұркен Бектасовтың жеке мұрағатындағы туындылары енді көпшіліктің жеке кітапханасынан табылары сөзсіз. Айта кетуіміз керек, бұған дейін жас автордың «Бала піл ұяла бермейді», «Батыл шаян», «Білім бәрінен қымбат», «Маруся және жаңа жыл» сынды бірқатар ертегілері балаларға арналған республикалық «Айгөлек», «Мөлдір бұлақ», «Балдырған» журналдарында жарық көрген. Талабы таудай Нұркеннің еңбегі ескерусіз қалмай, өткен жылы «Жан Шуақ» қоғамдық сыйлығының «Мүмкіндігі шектеулі жандардың ҚР мәдениет саласындағы айтулы жетістіктері үшін» аталымымен марапатталды. Ал 2015 жылдан бастап БҰҰ-ның Даму бағдарламасы аясында ШҚО бойынша орыс тілінен қазақ тіліне аударатын штаттан тыс бас аудармашысы қызметін атқаруда.
Нұркен Бектасов кеш барысында балабақша, мектептер, балалар үйлеріне өз кітабын сыйға тарту етті. Іс-шара барысында балалар және жасөспірімдер кітапханасының қуыршақ театры кітапқа енген ертегілер желісі бойынша көрініс көрсетті.
А. САМАТҰЛЫ,
«Семей таңы»
