Кеше, 12 қараша күні, қалалық әкімдікте «Медиативті технологияларды қолдану арқылы еңбек және әлеуметтік ұжымдық даулардың алдын алу» тақырыбында семинар өткізілді. Оған Семей қаласы әкімі аппаратының басшысы Зәуреш Исабаева, ШҚО кәсіподақтар кеңесінің төрайымы Нұржан Түсіпова, қалалық кәсіпкерлік бөлім басшысы Марат Нүгеров, Семей аймақтық салалық кәсіподақтардың координациялық кеңесінің төрағасы Сәбит Ибраев және өзге де мемлекеттік мекемелер мен кәсіпорындардың кәсіподақ өкілдері қатысты.
Семинарда алғаш болып сөз алған облыстық кәсіподақтар кеңесінің төрайымы Н.Түсіпова медиация туралы жаңадан қабылданған заңды жан – жақты түсіндіріп, оның ұжымдық еңбек дауларын шешуде ұтымды тұстары бар екенін атап өтті. Мәселен, медиативті технологияларды қолдану арқылы қызметте туындаған әлеуметтік мәселелерді сотқа жеткізбей, оның алдын алуға болатыны белгілі болды. Сондай-ақ басқосуда жуырда ҚР Парламентінің қос палатасы 2-ші оқылымда мақұлдаған жаңадан әзірленген Еңбек кодексі турасында айтылды.
{jcomments on}- Мемлекет басшысы Н. Назарбаевтың бес институционалдық реформасын жүзеге асыруға бағытталған «100 нақты қадам» құжатының 83-ші қадамы еңбек қатынастарын ырықтандыруға бағытталған. Бұл өз кезегінде ұжымдық еңбек қатынастарын қайтадан қарастыру қажеттілігін тудырды. Сол себепті де жаңа заңды дайындау уақыттың талабы деп қабылдағанымыз жөн. Оны Парламенттің жоғарғы және төменгі палаталары мақұлдап үлгерді. Бұл маңызды құжат алдағы уақытта Мемлекет басшысына жолданады. Жаңа заң әлі өз күшіне енген жоқ. Десе де ҚР Денсаулық сақтау және әлеуметтік даму министрі Тамара Дүйсенова бастаған топ жаңа заң жобасын халыққа түсіндіру жұмыстарын бастап кетті. Тамара Қасымқызы Астанада қатардағы жұмысшылармен жүздесіп, оларға Еңбек кодексі мен бюджеттік саладағы қызметкерлерге еңбекақыны төлеудің жаңа жүйесін түсіндірді. Жуық арада ШҚО-ға министрліктен жауапты тұлғалар түсіндіру жұмыстарымен келеді деп жоспарлануда. Біз де жалақыны төлеудің жаңа жүйесін түсіндіру мақсатында алдағы уақытта кездесулер өткізуді көздеп отырмыз. Бұдан бөлек Мемлекет басшысы Ұлт Жоспарының 88-қадамында Жалпыға Ортақ Еңбек Қоғамы идеясын енгізу керектігін айтты. Ол «Нұрлы жол» инфрақұрылымдық даму, Индустрияландыру және «Қазақстан-2050» Стратегиясын жүзеге асырудың мемлекеттік саясаты талаптарына жауап бере алатын жұмысшы және кәсіптік-техникалық мамандықтардың артықшылықтары мен танымалдылығын насихаттауға бағытталмақ. Бұл жұмыс беруші мен жұмысшының арасындағы еңбек құқықтарының бұзылмауына септігін тигізеді. Әсіресе бұл шағын және орта кәсіпкерлікке қатысты. Бүгінгі таңда әкімшілік кодекстің қатаңдатылғанын білесіздер. Еңбек шарттарын бұзған жұмыс берушілер заң алдында қатаң жауапкершілікке тартылатындығын ұмытпағаны дұрыс, — деді Нұржан Құрмантайқызы.
Сонымен қатар кездесу барысында ШҚО Кәсіподақтар орталығының заңгері Батырбек Нұрпеисов жиналғандарға, ұжымдық даулар кездескен жағдайда, оны шешуде медиативті әдістерді қолдану жолдарын түсіндірді. Айта кету керек, дәл осы тақырыптағы семинарлар облысымыздың өзге де аймақтарында ұйымдастырылған болатын.
Жақсылық
МҰРАТҚАЛИҰЛЫ,
«Семей таңы»
