14 қараша күні, Семей қалалық ІІБ – да ҚР Ішкі істер министрлігіне қарасты «Динамо» ерікті спорт қоғамының құрылғанына 90 жыл толуына орай, салтанатты жиын өтті. Оған Семей қаласы ІІБ—ның басшысы Жұмабек Исадилов, Семей қаласы әкімі аппаратының мемлекеттік — құқық бөлімінің басшысы Сержан Әзбергенов, спорт ардагерлері және ішкі істер қызметкерлері қатысты.
Құрылғанына 90 жыл болған «Динамо» ерікті спорт қоғамының бағындырған белестері аз емес. Ел спортының өркендеуіне өзіндік үлес қосып келе жатқанына ерікті спорт қоғамының саңлақтарының тәуелсіздік алған жылдардан бастап 46 олимпиада медалін иеленгенін дәлел ретінде айтуға болады. Бүгінде ҚР Ұлттық құрамасының 75 пайызын осы динамолық спортшылар құрап отыр. Аталмыш қоғамдастықтың Семейдегі филиалы да қарқынды жұмыс істеуде. Түрлі қалалық, облыстық, республикалық сайыстарда семейлік «Динамо» ерікті спорт қоғамының спортшылары үздіктер қатарынан көрініп жүр. Бұл туралы салтанатты жиында сөз алған Семей қаласы ІІБ-ның басшысы, «Динамо» ерікті спорт қоғамының Семей қаласы филиалының төрағасы Жұмабек Исадилов мәлім етті.
{jcomments on}- «Динамоның» тарихы күллі ел спорты дамуының жылнамасы деп айтсам, қателеспеймін. Өзінің алғашқы күнінен бастап біздің қоғамдастық спорт пен салауатты өмір салтының нышанына айналып үлгерді. Облыстық филиалдың ұйытқы болуымен жылда спорттың жазғы және қысқы түрлерінен спартакиадалар өткізіліп отырады. Олардың қатарына шаңғымен жүгіру, волейбол, шағын футбол, шахмат, күрес және атыс қаруынан ұйымдастырылатын біріншіліктерді жатқызуға болады. Спортшыларымыз, қалалық жарыстармен қатар, аймақтық және республикалық додаларда да жақсы өнер көрсетіп келеді, — деді Жұмабек Құсайынұлы.
Салтанатты жиында Семей қаласы әкімі аппаратының мемлекеттік — құқық бөлімінің басшысы Сержан Әзбергенов қалалық ІІБ қызметкерлерін қала әкімі Ермак Сәлімовтің атынан құттықтап, динамолықтардың бұқаралық спортты дамытудағы рөлі ерекше екенін атап өтті.
— Еліміз бойынша «Динамо» ерікті спорт қоғамының 90 жылдығы жоғары деңгейде аталып өтілуде. Осы спорт қоғамы арқылы талай бапкерлер мен спортшылардың бағы жанды. Бүгінде семейлік динамошылардың көрсетіп жүрген нәтижелері көңіл қуантарлықтай. Бұл ретте Самат Мақатұлының айрықша еңбегін айта кету керек. Ол кісінің жоғары ұйымдастырушылық қабілеті нәтижесінде жерлестеріміз биік тұғырдан көрінуде. Баршаларыңызды Семей қаласының әкімі Ермак Бидахметұлының атынан 90 жылдық мерейтойларыңызбен құттықтаймын, — деген лебізін жолдады Сержан Мұхтарұлы.
Салтанатты жиын «Динамо» ерікті спорт қоғамының 90 жылдығына арналған турнирде жеңімпаз бен жүлдегер атанған спортшыларды марапаттау рәсімімен жалғасын тапты. Нақтырақ айтсақ, жалпыкомандалық есепте Семей қалалық ІІБ-на қарасты арнайы мамандандырылған күзет ротасының № 2 батальоны топ жарып, жеңістің биік тұғырынан көрінді. Екінші орын ІІМ-нің оқу орталығы командасына бұйырса, үздік үштікті семейлік ІІБ-ның ұжымы түйіндеген екен. Барлық командалар арнайы сыйлықтарға ие болды. Сонымен қатар ішкі істер органдары және спорт ардагерлеріне мерейтойлық төсбелгілер мен естелік сыйлықтар табыс етілді.
Ж. СҮЛЕЙМЕН,
«Семей таңы»
