2005 жылдың 26 қазанында БҰҰ-ның Бас Ассамблеясының бастамасымен қарашаның үшінші жексенбісі Дүниежүзілік жол-көлік оқиғасының құрбандарын еске алу күні болып бекітілді. Аталмыш күн аясында қараша айының 9 – 15 күндері Семей қаласы ІІБ-ның әкімшілік полициясы «Қауіпсіз жол» акциясын өткізді. Акция шеңберінде өткен жұма күні жол сақшылары қалалық қан орталығында қан тапсырды.
Акция аясында қалалық ІІБ әкімшілік полиция бөлімі, жол-патрульдік полиция батальоны және жол-патрульдік полиция ротасынан 35 жол сақшысы қан тапсырды. Жол сақшыларының қан тапсырудағы басты мақсаты жол-көлік оқиғасынан құрбан болғандардың туыстары мен зардап шеккен азаматтарға қолдау көрсету әрі құқық қорғау қызметкерлерінің жұмысын бағалау болып табылады. Семей қаласы ІІБ әкімшілік полиция бөлімі, әкімшілік — тәжірибелік бөлімшесінің инспекторы Ләйлә Мұстафинаның сөзіне сүйенсек, жыл басынан бері қалада 400-ге жуық жол-көлік оқиғасы тіркелген екен. Салдарынан 23 адам қайтыс болса, 410 адам түрлі дене жарақаттарын алған.
— «Қауіпсіз жол» акциясы барысында жол сақшылары колледж студенттерімен кездесу өткізді. Ол жерде жастарға жол козғалысы ережелері түсін-діріліп, студенттерге өздерін толғандырып жүрген сауалдарға толыққанды жауап алуға мүмкіндік туды. Бұдан бөлек, жолаушыларды тасымалдаумен айналысатын мекеме жүргізушілерінің қатысуымен ашық есік күні ұйымдастырылды. Сонымен қатар апта соңында жол-көлік апатынан қаза тапқандарды еске алу мақсатында автошеру өткізіліп, көлік жүргізушілеріне ақпарат парақшалары таратылды. Айта кету керек, бүгінгі таңда жедел ақпарат орталығының бейнебақылау камералары әкімшілік полиция қызметкерлерінің жұмысын жеңілдетуде. Десе де өткен жылмен салыстырғанда жол — көлік оқиғалары биыл 20%-ға өсіп отыр. Осы ретте Семей қаласы ІІБ әкімшілік полиция бөлімі көлік жүргізушілер мен жаяу жүргіншілерге жол қозғалысы ережелерін мейлінше қатаң сақтауды ескертеді, — деді полиция лейтенанты Л.Мұстафина.
Жақсылық МҰРАТҚАЛИҰЛЫ,
«Семей таңы»
