«Нұр Отан» партиясының Семей қалалық филиалының қоғамдық қабылдауында қалалық Ішкі істер басқармасының басшысы Жұмабек Исадилов азаматтарды жеке мәселелері бойынша қабылдады. Кездесу барысында тұрғындардан түскен құқықтық сұрақ-тарға ІІБ-ның басшысы тұшымды жауап беріп, туындаған мәселелерге жіті назар аударды.
Шағым түсірген қала тұрғындарына сапалы әрі тез жауап беру мақсатында қабылдауға Семей қаласы ІІБ-ның жол- патрульдік полиция бөлімінің және барлық аумақтық полиция бөлімшелерінің басшылары келді. Өз ісінің тыңғылықты қаралғанын өтініп келгендердің бірі семейлік Мария Джаши болды. Ол өзінің танысы мен оның қызының алаяқтыққа жол бергеніне сенімді. Жиында аталған істі Затон полиция бөлімі қарастыратыны анықталып, аталған сұрақ назарға алынатын болды. Ал ІІБ-ның Әуезов полиция бөлімінің қызметкерлеріне шағымданған Победа көшесінің тұрғыны патруль қызметкерлері аулалардағы қауіпсіздікті күшейтсе деген ниетін білдірді. Оның айтуынша, спиртті-ішімдік ішкендер көше кезіп, қоғамдық тәртіпті жиі бұзады екен. Бұған жауап қайырған ІІБ-ның басшысы Жұмабек Құсайынұлы аталмыш мәселенің оң шешім табатынына сендірді.
Қоғамдық қабылдауда болған адамдарды толғандыратыны — әлеуметтік мәселелер, ал кейбірі құқықтық сауатсыздықтан орын алған түсініспеушіліктер болып шықты. Атап айтқанда, саяжайлардағы қоғамдық тәртіпті қадағалау шаралары, заңсыз қылмыстық іс қозғау, сондай-ақ құқық қорғау органдары қызметкерлерінің әрекетсіздік танытуы, т.б. жағдайларға көңілдері толмайтындарын жеткізді.
“СТ-ақпарат”
