Семей қаласында жасөспірімдер арасында өткен ел чемпионатының солтүстік-шығыс аймақтық жарысына Сидней Олимпиадасының чемпионы Ермахан Ыбрайымов бастаған бірқатар қазақ боксының майталмандары келген еді. Күні кеше шаршы алаңда жасындай жарқылдаған Болат Жұмаділов пен Серік Елеуов Семей жеріне келіп, балғын боксшылардың аяқ алысын тамашалаған еді. Ал 17 қараша күні аталған былғары қолғап шеберлерінің қатысуымен баспасөз мәслихаты өтіп, еліміздегі жасөспірімдер боксының дамуы жайы жан – жақты айтылды.
Баспасөз мәслихатында сонымен қатар ШҚО Бокс федерациясының атқарушы директоры Бекболат Жамангаринов, бокстан ҚР жасөспірімдер құрамасының аға жаттықтырушысы Қайрат Сәтжанов, бокстан жасөспірімдер арасындағы ҚР солтүстік-шығыс аймақтық чемпионаты бас төрешісінің орынбасары Қуат Құдайбергенов, Семей қалалық Бокс федерациясының президенті Құрманғали Рақышев қатысты. Республикалық олимпиадалық даярлау орталығының директоры Ермахан Ыбрайымовтың айтуынша, бокспен айналыстан жастардың саны артып отырғандықтан, ел чемпионатын 2 аймақтық кезеңге бөлуге тура келген. Биыл оның солтүстік-шығыс өңірлік бөлігін өткізу мәртебесі Семей қаласына бұйырған екен. Оған Астана қаласы, Солтүстік Қазақстан, Қостанай, Қарағанды, Павлодар, Алматы, Ақмола және Шығыс Қазақстан облысы командаларынан 200-ге жуық спортшы қатысуға ниет білдіріпті. Ал оңтүстік-батыс кезеңі Қызылорда қаласында өтеді деп жоспарланып отыр.
{jcomments on}- Семей — қазақтың киелі мекені. Сондықтан да ағымдағы жарысты Семей шаһарында өткізуге бел будық. Бұл чемпионаттан іркілмей өткен балалар Астанадағы шешуші додаға жолдама алады. Семейде спорттың дамуы жақсы жолға қойылғаны бізді қуантып отыр. Әсіресе бокс, күрес және өзге де жекпе-жек түрлерінен жеткен жетістіктер аз емес екен. Заман талабына сай дене шынықтыру және сауықтыру спорт кешені бар. Мұндай нысандар республикада саусақпен санарлықтай десе де болады. Кешен директоры Мерейғали Көшкінов дарынды балаларға арналған интернаттың құрылысымен таныстырды. Бұл өз кезегінде осы өңірдегі спорттың дамуына үлкен серпін беретіндігіне мен кәміл сенемін, — деді Сидней Олимпиадасының чемпионы Ермахан Ыбрайымов.
Баспасөз мәслихатында Семейдегі аймақтық біріншіліктің жоғары деңгейде екендігі айтылып, қолдау танытқан ШҚО және Семей қаласының әкімдіктеріне, ШҚО дене шынықтыру және спорт басқармасына, ШҚО Бокс федерациясына ұйымдастырушылар тарапынан алғыс білдірілді. Сонымен қатар баспасөз мәслихатында өзге де тақырыптар көтерілді. Мәселен, үлкен спортта, оның ішінде жекпе-жек түрлерінде жарақаттар жиі орын алатыны жасырын емес. Осы ретте спорт медицинасын қолға алу қажеттілігі туындайтыны анық. Бұл орайда Ермахан Ыбрайымов ҚР Мәдениет және спорт министрлігі жанынан ашылған дәрігерлік диспансер мен ғылыми орталықтың бар екенін атап өтті. Онда спортшылардың психологиялық әрі физикалық мүмкіндіктері тексеріледі.
— ҚР Бокс федерациясының президенті Тимур Құлыбаевтың бастамасымен орталыққа заманауи құрылғылар әкелінді. Ол кезегінде спортшыларды медициналық тұрғыда бақылауға мүмкіндік береді. Басқа дамыған мемлекеттердегідей, біздің елімізде де спортшыларға жақсы жағдай жасалынып жатыр,- дейді бұл ретте Е.Ыбрайымов.
Бұған қоса ШҚО Бокс федерациясының атқарушы директоры Б.Жамангаринов Өскемен қаласында облыстық дене шынықтыру диспансері салынып жатқанын, алдағы уақытта бүкіл аймақ спортшылары сол жерде толық медициналық тексеруден өтетінін жеткізді. Сондай-ақ аталмыш диспансердің филиалын Семейде ашу жоспарда бар екен.
Ж. СҮЛЕЙМЕН, «Семей таңы»
