Семей қаласы жұмыспен қамту және әлеуметтік бағдарламалар бөлімінің басшысы Қанатжан Есентайұлы Төлесбаев құрметті еңбек демалысына шықты. Аптаның сейсенбісінде Семей қаласының әкімі Ермак Сәлімов, қалалық мәслихат хатшысы Бейсенбек Ақжалов, әкім орынбасарлары, қалалық бөлім және мекеме басшылары Қанатжан Есентайұлын зор құрметпен зейнеткерлік демалысқа шығарып салды. Әріп-тестері өз құттықтауларын жеткізіп, ізгі тілектерін білдірді.
— Өздеріңіз жақсы білетін әріптесіміз Қанатжан Есентайұлын зейнеткерлікке шығарып салып отырмыз. Сіздің еңбегіңізді өзіңізбен жылдар бойы қызмет жасаған әріптестеріңіз жақсы біледі. Сіз жеке қасиетіңіздің және жұмыс барысындағы тәжірибеңіздің арқасында шаһарымыздың өркендеуіне айтарлықтай үлес қостыңыз. Қаламыз үшін де, облысымыз үшін де көп жұмыстар жасадыңыз. Зейнетке шыққаныңызбен, сіз әрқашан қатардасыз. Біз сізді қашанда құшақ жая күтеміз, – деген Ермак Бидахметұлы құттықтау хатын табыс етіп, қала әкімдігі атынан естелік сыйлық ұсынды.
Қанатжан Есентайұлы 1948 жылы дүниеге келген. Алматы қаласындағы Жамбыл технологиялық институтының филиалын, республикалық басқарушы кадрлар мектебін тамамдаған. Еңбек жолында Бесқарағай ауданының Ауыл, Долон тұқым қабылдау кәсіпорны директорының орынбасары, Аягөз қаласы элеваторының директоры, Семей облыстық нан өнімдерінің өндірістік бірлес-тігінің бас директоры болып қызмет істеді. Сондай-ақ Семей қаласы әкімінің бірінші орынбасары ретінде де жемісті еңбек атқарды. Ал 2007 жылдың сәуір айынан бастап қалалық жұмыспен қамту және әлеуметтік бағдарламалар бөлімі басшысы қызметін атқарды. Салтанатты шарада сөз алған әріптестері, достары білікті басшының елеулі еңбегі мен адамгершілік қасиеті турасында сөз қозғады. Қанатжан Есентайұлының іскерлігінің нәтижесінде жеткен жетістіктер айтылды. Жиналған қауым отбасына амандық пен жақсылық тілеп, ақжарма тілектерін жеткізді. Сондай ақ тілектің бірін Қанатжан Есентайұлымен ұзақ жылдар бойы қызмет еткен Қалиас Жұмабай да білдірді.
— Өмір өткен күндермен емес, есте қалған күндермен қымбат. Қанатжан Есентайұлымен сегіз жыл бірге жұмыс істедім. Осы жылдар аралығындағы сәттер көз алдымда. Сіздің Семей өңірінің дамуы жолында атқарған өнегелі істеріңіз һәм еңбегіңіз біздің көз алдымызда. Бүгінгі жиын да сізге көрсетілген зор құрмет деп санаймын, — деді Қалиас Жұмабай.
Асан МЫРЗАХАН, «Семей таңы»
