Семей қаласының № 30 жалпы білім беретін орта мектебінде «Мейірім» қайырымдылық акциясын ұйымдастыруға арналған дөңгелек үстел отырысы өтті. Аталған басқосуға қалалық білім бөлімінің басшысы Наталья Фесенко, жетекші маман Роза Омарова, қалалық мәслихат депутаты Айнұр Арғынбекова, «Жанұя орталығы» қоғамдық қорының заңгері Қуат Исабаев және мектеп директорлары мен ардагерлер кеңесінің мүшелері қатысты.
Басқосуда қазіргі қоғамдағы өзекті тақырып — ата-ананың қамқорлығынсыз қалған балаларға қолдау көрсету мәселесі сөз болды. Аталмыш мәселе өңірімізде жіті назарға алынып, 2011 жылдың наурыз айында Шығыс Қазақстан облыстық мәслихат сессиясында кешенді жоспар бекітілген. Қалалық білім бөлімінің жетекші маманы Роза Омарованың сөзіне сүйенсек, қазіргі күнде шаһар бойынша жүзден астам мемлекеттік мекемелер, жекеменшік ұйымдар мен кәсіпорындар осы жоспарды іске асыруда өз үлестерін қосып келеді. Мәселен, олардың ықпалымен жетімдер үйінің тәрбиеленушілері мен патронатқа алынған балғындардың жеке есеп-шотына жыл сайын бір күндік жалақы аударып отырады.
— Бүгінде 260 баланың «Тұрғын үй құрылыс жинақ банкі» АҚ – да есеп шоттары ашыл- ған. Оған шамамен 46 млн. теңге қаражат салынды. Бұл қаражатты олар есейе келе оқу орындарына түсу үшін немесе пәтер алуларына жұмсай алатын болады. 2013 жылы Семей қаласы әкімдігінің мұрындық болуымен балалар үйінің байырғы тәрбиеленушілері мен қамқорлық тәрбиесіндегі бала- ларға тұрғын үйлер бөліне бастады. Ол «Жұмыспен қамту — 2020», «Жол картасы — 2020» сынды бағдарламалар арқылы жүзеге асты. Осы уақытқа дейін шамамен 104 пәтер кілті табысталды. Осы санаттағы барлық балалар қалалық ТКШ жолаушылар көлігі және автомобиль жолдары бөлімінің тізімінде тіркеуде. Қазіргі уақытта олар пәтер алу кезектерін күту үстінде. Патронатты тәрбиедегі балалардың күтушілеріне мемлекет ай сайын 20 мың теңге көлемінде қаражат тағайындап отырады. Ал жетімдер үйінен бала асырап алам деушілерге 150 мың теңге көлемінде бір реттік қолдау көрсетіледі. Мұндай бастамалар 2012 жылдан бері қолға алынған. Бұл ретте мемлекет қоғамның әлжуаз топтарына көмек көрсету шараларын жалғастыра бермек, — деп атап өтті Роза Қабышқызы.
Дөңгелек үстел барысында ата – ананың қамқорлығынсыз қалған балаларға көмек көрсетудің түрлі ұсыныстары айтылды. Қатысушылар жылжымайтын мүлікке қол жеткізуді мақсат еткен жетімдерге несие пайызсыз берілсе деген ниеттерін жеткізді. Сонымен қатар қалалық білім бөлімінің басшысы Н.Фесенко балалардың жеке есеп шоттарында жиналған қаражаттың мақсатты жұмсалуын жіті қадағалау қажеттігін атап өтті.
Ж. СҮЛЕЙМЕН,
«Семей таңы»
