Семей қалалық қорғаныс істері жөніндегі басқармасында ҚР Қарулы Күштері қатарына шақырылған жастарды шығарып салу рәсімі өтті. Оған Семей қаласы әкімінің орынбасары Надежда Шарова, Семей қалалық қорғаныс істері жөніндегі басқарма басшысының орынбасары Асхат Ережепов, соғыс ардагерлері, «Жас Ұлан» ерлер лицейінің тәрбиеленушілері және Отан қорғаушылардың ата-аналары қатысты.
Шараны өткізудегі басты мақсат Қазақстан Қарулы Күштерінің абыройын арттыру әрі жастарды отансүйгіштікке тәрбиелеу болып табылады. Айта кету керек, Отан алдындағы міндетін өтеуге талпынған азаматтардың саны жылдан-жылға артып келеді. Бұған қоса бұрынғы кезеңдермен салыстырғанда әскерге шақырылғандардың денсаулықтары да жақсарып отыр. Шығарып салу рәсімінде сөз алған қала әкімінің орынбасары Н. Шарова Отан алдындағы борыштарын өтеуге аттанғалы тұрған жас-тарға анттарына берік болып, отбасыларына аман-есен оралуларына тілек білдірді.
— Осындай кездесулерді өткізу қаламызда игі дәстүрге айналды десем, қателеспеймін. Құрметті ана – аналар, сіздер балаларыңыздың Отан алдындағы борышын өтеуге бара жатқанын мақтан тұтыңыздар. Себебі дәл сіздердің перзенттеріңіз соған лайықты деп танылды. Ал міндетті борышын өтейтін саңлақтарға мықты денсаулық, қайтпас жігер тілегім келеді. Ел сенімін ақтауға бар күш-қайраттарыңызды салуға тырысыңыздар, — деді Надежда Шарова.
Жастарды әскерге шығарып салу рәсімінде соғыс ардагерлері де сөз алып, жылы лебіздерін білдірді. Солардың бірі Қазақстан Республикасы Қарулы Күштері ардагері, бірінші атом сүңгуір қайығының 3-ші ранг капитаны Біләл Мұқашев болды.
— Құрметті әскерге баратын жас сарбаздар. Сіздерге үлкен міндет артылып отыр. Оған үлкен жауапкершілікпен қарағандарыңыз абзал. Алдағы әскери борыштарыңызды абыроймен атқарып, әскери шеберліктеріңізді шыңдай түсуге тырысыңыздар. Ата-аналарыңызбен қатар, біз, аға буын өкілдері, сіздерге зор сеніммен қараймыз, — деді Б. Мұқашев.
Жақсылық МҰРАТҚАЛИҰЛЫ,
«Семей таңы»
