«Нұр Отан» партиясының Семей қалалық филиалының қоғамдық қабылдау бөлімінде ШҚО Мемлекеттік зейнетақы төлеу жөніндегі орталық директорының орынбасары Сергей Қабиғожин өңір тұрғындарына зейнетақы және зейнеткерлікке шығу мәселелері бойынша қоғамдық қабылдау өткізді.
Бүгінде еліміздің бар аймағында «Нұр Отан» партиясының қоғамдық қабылдау бөлімдерінде мемлекеттік органдар басшылары мен барлық деңгейдегі әкімдер, құқық қорғау органдарының басшылары, халық қалаулылары өңір азаматтарын жеке сұрақтары бойынша жүйелі түрде қабылдау өткізуде.
Осы орайда қаламыздағы жеке және заңды тұлғалардың жеке мәселелерін қарастырып, оларды шешуге көмектесу мақсатында «Нұр Отан» партиясы Семей қалалық филиалының қоғамдық қабылдау бөлімінде кезекті шара жүзеге асырылды. Бұл жолы азаматтарды зейнетақы мәселелеріне қатысты сұрақтары бойынша ШҚО Мемлекеттік зейнетақы төлеу жөніндегі орталық директорының орынбасары Сергей Қабиғожин қабылдау жүргізген болатын. Алдын ала хабарланған бұл қабылдауға 23 тұрғын жазылыпты. Қабылдау барысында аңғарғанымыз — құзырлы орын өкіліне өтінішпен келген жандардың басым көпшілігі еңбек кітапшасына енбей қалған жылдарын заң жүзінде қайта рәсімдеп, тиісті зейнетақысын алу жолдарын сұрап келіпті. Солардың бірі Юность кентінің тұрғыны Татьяна Дашкина болды. Ол өзінің еңбек кітапшасына Ресейдің Новосібір қаласына көшіп кетуі себепті 1980-1985 жылдар аралығындағы қызмет өтілі енбей қалғанын айтып шағымданды. Бұл қаладан тек жұбайы өмірден озған соң ғана қайтып оралған екен. Ұзақ жылдар бойы аспаз болып еңбек еткен жан өз сауалына заң тұрғысынан қанағаттанарлық жауап алды. Сонымен қатар 2018 жылдан бастап зейнетақы рәсімдеу және тағайындау туралы жаңа заңның аясында қолына тиетін қаражаттың да артатынына қуаныш білдірді.
Сол тәрізді Есләмбек Оспанов та өзінің 50 жыл бойғы еңбек өтілінің кейбір жылдары еңбек кітапшасына енбей қалғанын айтты. Сергей Қабиғожаұлы өз жауабында азаматтың өтініші тек белгілі заң аясында ғана қаралатынын айта келіп, тиісті кеңес берді. Сонымен қатар келергі жылдан бастап еліміздегі зейнетақыға қосылатын 9 пайыздық үстеме туралы да айтып өтті.
Жалпы, бұл күнгі қабылдау барысында мәселесі жылдам шешілген азаматтар да болды. Атап айтсақ, Рысгүл есімді қала тұрғыны өзінің 102 жастаға кәрі анасының не бары 18 мың теңге ғана зейнетақы алатынын, оған президенттік зейнетақы қосылмай қалғанын айтып, көмек сұрап келді. Азаматтың түсініктемесіне қарап отырып, құзырлы мамандар бұл мәселені жылдам шешуге болатынын айтты. Азаматшаға тек зей- нетақы төлеу орталығына қажетті құжаттармен барса болғаны.
Қоғамдық қабылдау барысында сонымен қатар еңбек өтілі бар мүгедек жандар да келіп, тұшымды кеңес ала алды.
ШҚО Мемлекеттік зейнетақы төлеу жөніндегі орталық директорының орынбасары Сергей Қабиғожиннің айтуынша, бүгінде ел азаматтарын зейнетақымен қамту ісінде оң өзгерістер мол. Яғни, аталмыш сала бойынша жыл өткен сайын жаңа заңнамалар қабылданып, толықтырылып, жетілдірілу үстінде. Бұл шара әсіресе еліміздегі егде тұрғындар игілігіне оң ықпал етуде.
Қоғамдық қабылдау барысында зейнет жасындағы азаматтарға жаңа заңның талаптары, зейнетақыны рәсімдеу сынды бірқатар мәселелер бойынша да жан – жақты түсінік берілді.
Қуаныш ЖОЛЫМБЕТ,
«Семей таңы»
