Абай атындағы театрда мүмкіндігі шектеулі балалар мен жастарға арналып «Шуақты әлем» атты байқау өтті. Мәдени шара 1 желтоқсан — ҚР Тұңғыш Президенті күні мен Дүниежүзілік балалар күніне орай ұйымдастырылды.
Мәдени шараға қаланың зиялы қауымы, мүмкіндігі шектеулі балалардың ата-аналары арнайы шақырылды. Айта кету керек, мұндай байқау биыл тоғызыншы рет ұйымдастырылып отыр. Аталмыш кештің өтуіне «Исток» балалар және жастар шығармашылық орталығы» қоғамдық бірлестігінің қосқан еңбегі зор. Шараның мақсаты – мүмкіндігі шектеулі балалар мен жастардың ішінен таланттарды анықтау әрі олардың қоғамға бейімделуіне жағдай жасау, кедергісіз орта қалыптастыру. Кештің ашылу салтанатында сөз алған қалалық ішкі саясат бөлімінің басшысы Айдар Садырбаев Семей қаласы әкімінің құттықтау тілегін жеткізді.
— Семей қаласы әкімдігі атынан жадыраған күндей өзінің нұрын сыйлай білген мейірімді жандардың шығармашылық кешінің ашылуымен баршаңызды құттықтаймын. Мерекелік кештің ҚР Тұңғыш Президенті күнімен тұспа-тұс келіп отырғаны қуантады. Ел Тәуелсіздігін қалыптастыруда Мемлекет басшысының рөлі ерекеше екені айтпаса да түсінікті. Мемлекет басшысы жыл сайынғы Қазақстан халқына арнаған Жолдауларында мүмкіндігі шектеулі жандарға айрықша көңіл бөліп келеді. Міне, жылдағы дәстүрге сәйкес, шаһарымызда тоғызыншы жыл қатарынан «Исток» қоғамдық бірлестігінің ұйымдастыруымен өнер байқауы өткізілу үстінде. Биылғы жылы да жаңа есімдердің шығатынына зор сеніммен қараймыз, — деді Айдар Серікқазыұлы.
Сонымен қатар театр фойесінде мүмкіндігі шектеулі балалар жасаған сәндік қолданбалы өнер туындыларының көрмесі өтті. Байқауда ән айту, би, бейнелеу өнері, сәндік қолданбалы өнер және фото өнері, сынды номинациялар бойынша үздіктер анықталды. Барлық қатысушылар мен жүлдегерлерге арнайы дипломдар және демеушілер тарапынан әзірленген сыйлықтар табыс етілді.
Ж. МҰРАТҚАЛИҰЛЫ,
«Семей таңы»
