Семей қаласы өңірлік онкологиялық диспансері америкалық «Vartan» фирмасының «TrueBeam» деп аталатын обыр дертін емдеуге арналған жаңа құрыл-ғысымен толықты. Соңғы үлгідегі арнайы қондырғыны Орта Азия елдері ішінде бірінші болып қазақстандықтар қолданысқа алып отыр. Өткен сейсенбі күні онкологиялық диспансер мамандары қатерлі ісікті жоғары деңгейде емдейтін «TrueBeam» сәулелендіру құрылғысын БАҚ өкілдеріне арнайы таныстырды. Айта кету керек, аталған заманауи қондырғы еліміздің бес қаласына әкелінген.
«TrueBeam» сәулелендіру құрылғысы науқастың өзге ағзаларын зақымдамай, тек обыр орналасқан аймақты сәулелендіреді. Халықаралық есеп бойынша, қазір қатерлі ісіктің бірінші сатысында тұрғандың 70%-ы сәуле терапиясына мұқтаж. Ал «TrueBeam» құрылғысында науқастарды жоғары технологиялық сәулемен емдеудің заманауи, тексерілген әдістерін барынша кеңінен қолдануға мүмкіндік бар. Бұл аппараттың қосымша қалқандары науқастың обырына сәйкес түрлі формаға еніп, ісік ошағына сәуленің ең көп мөлшерін жібереді. Өзге сау ағзалар мүлдем зақымданбайды. Қосымша ауырсыну сияқты емнің зиянды әсерлері де болмайды.
Аталған жаңа құрылғының көмегімен онкологиялық дертке шалдыққандардың санын едәуір азайтуға мүмкіндік бар. Бұл — Мемлекет басшысының денсаулық сақтау саласына ерекше көңіл бөліп, арнайы қабылдаған бағдарламалары аясында атқарылып жатқан жұмыстардың айшықты көрінісі. Қазір еліміздегі барлық онкологиялық диспансерлер заманауи құрылғылармен, компьютерлік томография, рентген, узи-аппараттармен жабдықталған. Дәрігерлер шетелдерде тәжірибе алмасып, білімдерін жетілдіруде. Семейдегі онкологиялық диспансерде қазір науқастарды химиотерапиямен емдеу тегін. Ал құрылғыны орнату 2011-2015 жылдарға арналған «Саламатты Қазақстан» мемлекеттік бағдарламасы аясында жүзеге асыпты. Елбасының тапсырмасымен қабылданған бағдарламаның негізгі міндеттерінің бірі тұрғындардың жоғары технологиялық аппараттарға қолжетімділігін арттыра түсу болатын.
Енді «TrueBeam» сәулелендіру құрылғысының көмегімен өңірдің онкологиялық саласы жаңа деңгейге көтерілмек. Яғни, жаңа технология арқылы соңғы емдеу стандарттарына көшу, мамандардың біліктілігін арттырумен қатар, науқастардың жоғары технологиялық емдеу әдісіне қол жеткізуіне мүмкіндік берілді. Шетелге шығып ем іздеудің де еш қажеттігі жоқ. Шетел демекші, осы күні Семей қаласы өңірлік онкологиялық диспансері базасында «Жоғары технологиялық сәуле терапиясы» тақырыбында Латвияның Рига қаласындағы Терапиялық радиология және медициналық физика клиникасының сәулелі терапия бөлімінің меңгерушісі, доктор Занда Лиепа шеберлік сабақтарын өткізді. Дәріске Семей қаласынан өзге, Павлодар, Өскемен, Орал қалаларының радиолог дәрігерлері мен медицина физиктері қатысты. Ондағы мақсат — қазақстандық мамандарды онконауқастарға жоғары технологиялық сәулемен емделудің толық көлемін алуға мүмкіндік беретін емдеу әдісіне үйрету. Айта кету керек, жаңа қондырғымен жұмыс жасайтын мамандар бұған дейін бірқатар елдерде арнайы курстардан өткен. Медициналық құрал бірнеше күннен кейін толықтай іске қосылады деп күтілуде.
А. САМАТҰЛЫ,
«Семей таңы»
