Аймағымызда сақалды құрылыстарға жан біте бастады. Бұл құрылыстардың жүргізілу барысын облыс әкімі Даниал Ахметов тікелей қадағалауына алып отыр. Осы орайда Үржар ауданындағы жұмысы тоқтап қалған құрылыстар да аудан әкімі Серік Зайнулдиннің басшылығымен дұрыс жолға қойылуда. Осы ретте әлеуметтік нысандардың халық игілігіне берілуіне баса мән берген Серік Зинабекұлы ауылдық округтердегі құрылыс нысандарын да назардан тыс қалдырған емес.
Таяуда Үржар ауданының әкімі Серік Зайнулдин арнайы жұмыс сапарымен Елтай ауылында болып қайтты. Мұнда жақында ғана ауыл халқы ширек ғасырға жуық күткен екі ауылдың арасын жалғайтын көпір қолданысқа берілген болатын. Ендігі кезек екі мыңға тарта халықтың асыға күтіп жүрген Мәде-ниет үйі еді. Ауыл ортасындағы іргесі 1976 жылы қаланған ғимарат өткен ғасырдың тоқырау жылдарында жекенің иелігіне өтіп, қараусыз қалған болатын. Алайда аудан басшысы Серік Зинабекұлының күш салуымен, әр ауылда жастардың тұрақтауы үшін, заман ағымынан қалыс қалмауы үшін, мәдениет ошақтары болуы тиіс деген жаңа міндет аясында ғимарат ауыл халқына қайтарылып берілді. Бүгінгі күні өңірлерді дамыту бағдарламасы аясында аталмыш ғимарат құрылысына 12 млн. теңге қаржы бөлініп, шатыры, жылу беру жүйесі, сахнасы толықтай жаңартылуда. Мұндағы күрделі жөндеу жұмыстарына ауылдың 30-ға жуық құрылысшысы тартылып, нәпәқасын табуда. Құрылысты жүргізіп жат-қан алматылық «Жасұлан» ЖШС-нің құрылысшылары таяу уақытта Мәде-ниет үйін халық игілігіне береміз деп отыр. Осылайша, аудан орталығынан шеткері жатқан тағы бір ауылдың мәдени саласы көркейе түспек.
Бауыржан ЖАҚЫП, «Семей таңы»
