Еліміздің бірқатар өңірлері тәрізді Семей қаласында да қалыптасқан бір үрдіс бар. Жылда қыстың алғашқы күнінде, яғни 1-ші желтоқсанда орталық алаңға шаһардың бас шыршасын салтанатты түрде орнату ұзақ жылдардан бері дағдыға айналған болатын. Алайда биылғы жылы «дәстүр» өзгеше сипат алмақ.
Нақтырақ айтсақ, жас буынға патриоттық тәрбие беру мен Тәуелсіздік күніне құрмет һәм ел егемендігі жетістіктерін насихаттау бұл жолы бірінші кезектегі басты мұрат болып отыр. Осы орайда, Жаңа жылға байланысты орталық алаңды безендіру жұмыстары еліміздің басты мерекесі – Алаш жұрты үшін айрықша ардақты мереке Тәуелсіздік күнінен кейін жүргізілетін болды. Бұл туралы қала әкімінің баспасөз қызметі мәлімдеді.
«Семей қаласының әкімі Ермак Бидахметұлы Сәлімовтың арнайы тапсырмасына сәйкес, орталық алаңды безендіру жұмыстары 1 желтоқсаннан 17 желтоқсанға шегерілді» — делінген аталмыш хабарламада.
Естеріңізге сала кетсек, осыдан біраз бұрын «Нұр Отан» партиясы жергілікті атқарушы органдарға «Тәуелсіздік күні өткенше Жаңа жыл мерекесіне дайындық шаралары басталмауы керек» деген ұсыным-хат жолдаған еді. Бұл жайында билік партиясының баспасөз орталығы арнайы хабарлаған болатын. Осы ретте ұсынымның ұлылар мекені болған, Алаш жұртының рухани астанасы саналған Семей қаласында да әкімдік тарапынан қолдау тауып отырғаны қуантады. Осыған дейін айтылып келе жатқан, «азаттығымыздың айғағы Тәуелсіздік тойы — шыршаның тасасында қалмауы керек!» деген ұлттық мүддені көздейтін, мемлекетшіл қала зиялыларының пікірі осылайша кешегі Алашорда астанасында да іс жүзінде көрініс таппақ.
«СТ- ақпарат»
