27 қараша күні Семей қалалық әкімдігінде «Өсімдік және мал шаруашылығын субсидиялау жүйесін реформалау» және «Ауыл шаруашылығы кооперативтері туралы» Заңын талқылау мақсатында арнайы жиын өтті. Оған ҚР Ауыл шаруашылы министрінің орынбасары Гүлмира Исаева, ШҚО әкімінің орынбасары Дүйсенғазы Мусин, ШҚО ауыл шаруашылығы басқармасының басшысы Дүйсембай Селиханов және аймақтың бірқатар шаруа қожалық басшылары қатысты.
Естеріңізге сала кетсек, 15 қараша күні Мемлекет басшысы Н. Назарбаев «Ауыл шаруашылығы кооперативтері туралы» Заңына қол қойған болатын. Құжатты әзірлеудегі негізгі мақсат — ауыл шаруашылық кооперативтері мен оларға қарасты қауымдастықтардың қызметтерін құқықтық тұрғыда реттеу әрі осы саладағы заңнаманы жетілдіру болып табылады. Заң жобасы күшіне енгеннен кейін, шаруа қожалықтарын ірілендіру есебінен ауыл- шаруашылық саласындағы бәсекелестік ұлғая түседі деп күтіліп отыр. Сондай-ақ ол еліміздің азық-түлік әрі экономикалық қауіпсіздігіне оң әсерін береді деп күтілуде.
{jcomments on}- Бүгінде біз Елбасы жүктеген мал шаруашылығы мен ет өңдеу саласын дамыту үшін трансұлттық компанияларды құруды қолға алдық. Осы бағытта «Еуразия Агро Холдинг» ЖШС-нің мұрындық болуымен Аягөз ауданында бірегей ет комбинаты бой түзейді деп жоспарланып отыр. Мұнда қой етін өндіру мен қайта өңдеу саласына басымдық берілетін болады. Ол трансұлттық компанияларды құрудағы үздік 15 жобаның тізіміне еніп отыр. Ал жаңа қабылданған заң, еліміздің шаруаларына көптеген мүмкіндіктерге жол ашады. Мәселен олар мемлекет тарапынан толыққанды қаржылай қолдауға ие болады. Бұған қоса салық режімі оңтайланады. Шығыс Қазақстан облысында пайдалынылмай жатқан бос жерлер бар. Аймақта ауыл шаруашылық саласын жіті түсінетін білгір мамандар жетерлік. Тек қана осы кәсіптің нәсібін көретіндей жағдай жасалуы қажет. Бұл құжаттың көмегімен аймақ шаруаларының екінші тынысы ашылатынына сенімдімін. Біздің министрлік Қытай нарығына шығу үшін бірқатар жұмыс жүргізуде. Ол өз кезегінде ШҚО экономикасының жақсаруына септігін тигізеді деген ойдамыз. Себебі аспан асты елі Қазақстанның ауылшаруашылық өнімдерін табиғи таза тауар ретінде бағалайды, — деді Гүлмира Исаева.
Аягөз ауданыны ң әкімі Бақытжан Байахметов ауданда тұрғызылатын ет комбинатының аумағы 7,4 га құрайтынын және қазіргі күнде оның жобалық-сметалық құжаттары дайындалып жатқанын жеткізді. Сонымен қатар ол жаңа «Ауыл шаруашылығы кооперативтері туралы» Заңын аягөздіктер оң көзқараспен қабылдағанын атап өтті.
— Осы заңды біз көптен күткенбіз. Себебі өткен жылы «Еуразия Агро Холдинг» ЖШС-мен бірлесіп аудандағы 44 шаруа қожалықтарымен келісімге отырдық. Алайда ол кездегі заңның кейбір тұстары әлсіздеу еді. Ал мына соңғы қабылданған құжатты зерттеп-зерделеп шықтық. Ол, расымен де, біздің кәсіпкерлерімізге көптеген мүмкіншіліктер бермек. Жоғарыда аталған шаруа қожалықтардың иелігінде бүгінде 111 мың гектар жер бар. Оның 7 101 гектары шабындық. Бұл өз кезегінде малды толығымен азық қорымен қамтуға мүмкіндік береді. Қазіргі уақытта ұсақ малдың құны түсіп жатқаны мәлім. Ал Аягөз ауданында салынатын ет комбинаты мал шаруашылығының дамуына өз үлесін қосады деп күтілуде. Оның көмегімен жылына 376 мың ұсақ мал және 53 мың ірі қара малдың етін өңдеу жоспарланып отыр, — деп атап өтті Бақытжан Кәкенқажыұлы.
Басқосуда ҚР Ауыл шаруашылығы министрінің орынбасары Г. Исаева Үкіметінің мал шаруашылығын субсидиялауды тоқтатпайтындығын, керісінше, осы бағыттағы шараларды үдете түсетінін нақтылап айтып берді.
Жақсылық МҰРАТҚАЛИҰЛЫ, «Семей таңы»
