Ұлттар достығының ұясына айналған Семей шаһарында Қазақстан халқы Ассамблеясының 20 жылдығын қорытындылауға арналған салтанатты жиын өтті. Елдіктің өлшемі, тұрақтылықтың тұтқасы болған Ассамблеяның мерейтойы осы жылы абыроймен атқарылып, мерейлі мерекені қорытындысы қалалық Достық үйінде аталды.
Ел тәуелсіздігінің ең жауапты кезеңінде құрылып, бірлігіміздің бастауы бола білген Ассамблея өзінің өміршеңдігін көрсетіп келе жатқанын бір ғана Семейдегі оннан аса ұлттық-мәдени орталықтардың ұтымды жұмысынан-ақ көруге болады. Ұлттық болмыстарымен ерекшеленген мәдени орталықтардың бірлігі жарасып, жасапмаздықтың үлгісін көрсетіп тұрды. Мерекеге қатысушыларды алғаш болып Семей қаласы әкімінің орынбасары Надежда Шарова құттықтады.
{jcomments on}- Құрметті семейліктер! сіздерді Қазақстан халқы Ассамблеясының 20 жылдығын қорытындылауға арналған салтанатты жиынмен құттықтауға рұқсат етіңіздер. Осы жылы бірқатар атаулы күндердің арасында әлемде теңдесі жоқ институт — Қазақстан халқы Ассамблеясының 20 жылдығы да аталды. Оның бастамашысы Елбасымыз Н.Назарбаев екені баршаларыңызға аян. Қазақстан Республикасының Тұңғыш Президеті күніне орай өткізіліп отырған мерекелік кешпен баршаларыңызды құттықтаймын. Елімізге тұрақтылық пен тыныштық, береке-бірлік, отбасыларыңызға амандық тілеймін, — деді Надеджа Шарова. — Ағымдағы жылы атаулы күнге байланысты ауқымды істер атқарылды. Ең бастысы, осы шаралардың барлығы елімізде тұрақтылықты сақтауда, ортақ үйімізде бейбітшілік пен бірлік идеясын жүзеге асыруда және Қазақстан халқының қоғамдық келісімін сақтауда елеулі орын алды. Бүгінде Қазақстан халқы бір шаңырақ астында тату өмір сүруде. Биылғы жыл біртұтас Қазақстан халқының теңдессіз және елеулі жетістіктерін айшықтайтын, ел халқының бірлігі мен ынтымақтастығын, бейбітшілігін дәріптейтін жыл болып есте қалады.
Салтанатты жиында Семей қаласының бірқатар этномәдени орталықтары мен үкіметтік емес ұйым мүшелері және қаламыздың белсенді азаматтары марапатталды. Атап айтар болсақ, ұлтаралық келісімді сақтауға және қоғамдық жұмыстарға белсене қатысқаны үшін қаланың қадірменді ақсақалы, еңбек ардагері Серік Төлеуғалиев пен Достық үйі директорының орынбасары Самал Ешімова қала әкімінің алғыс хатымен марапатталды. Ал ҚР Президентінің жарлығы бойынша “Қазақстан халқы Ассамблеясының 20 жылдығы” мерекелік медалімен Корей этно-мәдени орталығының төрағасы Леонил Ким, «Возрождение» неміс этномәдени орталығының төрайымы Лилия Гончарук және Қазақ әлеуметтік мәдени орталығының төрайымы Шаған Жанаева марапатталды. Сондай-ақ бірқатар қатысушылар Қазақстан халқы Ассамблеясы хатшылығының, Шығыс Қазақстан облысы мәслихаты мен қалалық мәслихаттың және қалалық мәдениет және тілдерді дамыту бөлімінің алғыс хаттарымен марапатталды. Мерекелік жиын қаладағы ұлттық мәдени орталық өнерпаздарының концертіне ұласты.
Асан МЫРЗАХАН, «Семей таңы»
