Қазақ инновациялық гуманитарлық – заң университетінде білім ордасынан әр жылдары түлеп ұшқан түлектер «Алтын ұяға тағзым» әлеуметтік жобасы аясында таяуда бас қосты.
«Алтын ұяға тағзым» әлеуметтік жобасы — Жалпыға Ортақ Еңбек Қоғамы идеясын ілгерілету және «Ұлт Жоспары — 100 нақты қадам» бағдарламасын насихаттау. Елбасы ұсынған «Ұлт Жоспары – 100 нақты қадамның» 88 — қадамы тәуелсіздік жылдарында мемлекеттік саясаттың арқасында еңбек, кәсіпкерлік, ғылым мен білім және басқа да қызметтерде жоғары нәтижелерге қол жеткізген қазақстандықтардың (біздің заманымыздың кейіпкерлерінің) табыстарының дербес тарихын ескере отырып Жалпыға Ортақ Еңбек Қоғамын ілгерілетуге және насихаттауға бағытталады. Осы тұрғыдан алғанда, республиканың түкпір-түкпірінде өзінің кәсіби саласында елеулі табыстарға жеткен түлектердің жетістіктерін студент жастарға үлгі ету іс-шараның басты міндеті болды. Аталған жобаны жүзеге асыруда университет ректоры Шырын Құрманбаеваның бастамасымен «Қазақ инновациялық гуманитарлық-заң университеті түлектері қауымдастығы» қоғамдық бірлестігі құрылды. Университетте әр жылдары оқыған түлектерді қолдауды көздеген қоғамдық бірлестік бүгінгі күні жемісті жұмыс атқаруда.
— Жоғары оқу орнының басты стратегиялық бағыты — түлектермен ынтымақтастық байланыста болып, студенттеріміздің жұмысқа орналасуы және өндірістік тәжірибеден өтуі, сондай-ақ дуальды оқыту бағдарламасын жүзеге асыруды бірлесіп қолға алу. Қаз ИГЗУ – ді бітірген түлектер, білім алып жүрген студенттер және оқытушы профессорлар қауымы үшін Қаз ИГЗУ ортақ үйіміз екенін сезіну – көздеген нәтижеміз, — дейді Қаз ИГЗУ ректоры, саяси ғылымдар докторы, профессор Шырын Құрманбаева.
«Алтын ұяға тағзым» әлеуметтік жобасы аясында «Қазақ инновациялық гуманитарлық-заң университеті түлектері қауымдастығы» қоғамдық бірлестігінің тұсауы кесілді. Ал осыдан кейін ШҚО туризм және сыртқы байланыстар басқармасы мен ҚР «Атамекен» Ұлттық кәсіпкерлер палатасы Астана филиалымен университет арасында өзара әріптестік туралы меморандумға қол қойылды. Сондай-ақ іс-шаралар барысында «Түлек-жұмыс беруші-жоғары оқу орны: ынтымақтастық сұхбаты» тақырыбындағы дөңгелек үстел, «Дебат ойындары», «Жас заңгерлер достастығы», «КВН» бойынша шеберлік сыныптары өткізілді. Ал осы шаралардың соңында оқу орнының әр жылдардағы түлектерін «Құрметті түлек» белгісімен марапаттау рәсімі өткізілді. Сонымен қатар түлектер тарапынан университет студенттеріне арналған қолдау стипендиясы салтанатты жағдайда табысталды.
Асан МЫРЗАХАН,
«Семей таңы»
