1 желтоқсан – ҚР Тұңғыш Президенті күні мемлекеттік мерекесін жалпыхалықтық мейрам ретінде атап өту дәстүрге айналды. Ел тарихында айтулы мерекені бірлігі мен берекесі жарасқан Жарма ауданының тұрғындары да айрықша сән – салтанатпен қарсы алды. Аудан әкімі Нұрлан Сыдықовтың бастамасымен ҚР Тұңғыш Президенті күніне арналған салтанатты жиын биыл Шар қаласында өтті.
Шардың Мәдениет үйінде өткен салтанатты жиында алдымен аудандық мәслихат хатшысы Нұрлұбек Есполов жиылған қауымды құттықтап, Елбасының егемендік алған жылдардан бастап атқарған еңселі істеріне тоқталып өтті.
— Тәуелсіздіктің алғашқы қиыншылыққа толы жылдарында республиканың көпұлтты халқының, мемлекет болашағының, тәуелсіздікті баянды етудің тарих алдындағы жауапкершілігі Тұңғыш Президентке жүктелді. Сол бір алмағайып заманда Нұрсұлтан Назарбаев сынды тұлғаның егемен ел тарихындағы атқарған қызметі мен рөлі ерекше. Еліміздің өтпелі кезеңіндегі қиындықтар мен сынақтарды еңсеріп, даму мен өркендеудің өзіндік жолын тапқан Мемлекет басшысының жан-жақты сараланған ішкі және сыртқы саясаттағы көрегендігінің қаншалықты маңызды болғаны- дәлелдеуді қажет етпейтін ақиқат,- деді аудандық мәслихат хатшысы Нұрлұбек Оспанбекұлы.
{jcomments on}Сонымен қатар аудандық мәслихат хатшысы Елбасының биылғы 30 қарашадағы Қазақстан халқына арнаған «Қазақстан жаңа жаһандық нақты ахуалда: өсу, реформалар, даму» атты Жолдауына да кеңінен тоқталды. Оның ішінде Жолдаудың экономикалық өсім мен инвестициялық белсенділікті қолдауға, халықтың табыс деңгейінің төмендеуінің алдын алуға және жаңа жұмыс орындарын ашуды ынталандыруға, бюджет қаражатын тиімді пайдалануға бағытталғаны жайында айтып өтті.
— Айта кету керек, Мемлекет басшысының өңірлерді өркендетуге бағытталған тапсырмалары негізінде Жарма ауданында үстіміздегі жылдың соңғы айларында ішінде экономикалық, әлеуметтік салаларда айтарлықтай жетістіктер бар. Ауданның өнеркәсіп саласында цемент, әктас шығару, кен өндіру ісіндегі жобалар табысты жүзеге асып, ауыл шаруашылығы саласының өрісі кеңейіп келеді, — деді Нұрлұбек Есполов.
Салтанатты жиында сөз алған Шар қалалық ақсақалдар алқасының төрағасы Серікжан Ирбаев Тұңғыш Президент күні мерекесінің аға буын үшін мәні мен маңызы тереңде екенін айта келе, барша жиылған қауымды құттықтады.
— Мен еліміздегі оң өзгерістердің барлығын Мемлекет басшысының сарабдал саясаткерлігімен, көсемдік көрегендігімен сабақтастырамын. Жаһандық дағдарыс жағдайында елімізді кез келген тығырықтан алып шығатын дара тұлға екеніне де бек сенемін. Сондықтан да Елбасы Жолдауында, «Ұлт Жоспары – 100 нақты қадам» бағдарламасында ұсынылған міндеттерді жүзеге асыруда бірлігімізді бекемдеп, жұмыла еңбек етуіміз қажет деп білемін. Біздің барлық іс – әрекетіміз еліміздің әлемдегі алдыңғы қатарлы 30 елдің қатарына қосылуына жол ашатын қадамдарға арналуы керек,- деді Серікжан Ирбаев ақсақал.
Ал аудан жастары атынан сөз алған Абай атындағы мектеп-гимназияның мұғалімі Анар Әділғазықызы елімізде білім алып, еңбек етемін деген жалынды жастарға Елбасының қашанда қамқорлық көрсетіп келе жатқанын атап өтті
— «Еркін елде өскен ұрпақтың рухы әрдайым биік болуы тиіс. Жастары жалын жүректі, өршіл намысты, биік рухты болса – ол елдің еңсесі де биік болады. Өршіл, намысшыл жас отаншыл патриот келеді, халқына, өз ұлтына адал қызмет етуге ұмтылады», — деген Елбасы сөзі жастарға зор сенім артады. Тәуелсіз елде дүниеге келген жас ұрпақ біздер үшін бұл- үлкен аманат. Ендеше, келешектің иелері — аудан жастары «Мәңгілік Ел» мұраттарын іске асыруға, Ұлы Дала елінің лайықты азаматтары болуға барлық білімдерін, күш-жігерлерін жұмсайды,- деген Анар Әділғазықызы жастар атынан сенім білдірді.
Жүрекжарды лебіздерден кейін сахна төріне көтерілген аудан әкімі Нұрлан Сыдықов тұғыры биік тәуелсіздігіміздің 24 жылында жеткен барлық жетістіктеріміз бен бағындарған белестеріміздің Тұңғыш Президент Н. Назарбаевтың есімімен тікелей байланысты екенін, Тұңғыш Президент күні — бірлік пен татулықтың, Қазақстан халқының Ұлт Көшбасшысына деген зор құрметінің символы деп атап өтті.
Мереке күні аудан әкімі бірқатар еңбек адамдарына лайықты құрмет көрсетті. Атап айтатын болсақ, «Қазақстан халқы Ассамблеясына 20 жыл» мерекелік медалімен Шар қалалық ардагерлер кеңесінің төрағасы Қыдырбек Мұсатаев, білім беру саласының үздігі және ардагері, Қаратөбе ауылдық ардагерлер кеңесінің мүшесі Елена Квач марапатталды. Ал Жарма ауданы әкімінің Құрмет грамотасымен Шар қаласы әкімі аппаратының бас маманы Роза Қыдырбаева марапатталса, бірқатар сала мамандары еселі еңбектерімен аудан әкімінің алғыс хатына қол жеткізді.
Мереке атағы алысқа кеткен Жарма ауданы өнерпаздарының концертімен жалғасын тапты.
Мейірхан ОСПАНБАЕВ,
«Семей таңы»
