Қазақстан Республикасының Тұңғыш Президенті күні Үржар ауданы бойынша да кең көлемде мерекеленді. Барша отандастарымыз үшін айтулы бұл күн Барқытбелдің баурайындағы Үржар ауданында ерекше жағдайда, барынша сән-салтанатымен өтті.
Мерекені атап өту мақсатында жарияланған онкүндік қараша айының соңына таман басталып, желтоқсан айының алғашқы күні – дәл мерекеде қорытындыланды. Көк байрағымызды көкке көтерген ауданның белсенді жүз спортшысы «Мәңгілік Ел» монументінен бастап, Абылайхан даңғылы бойымен жүгіріп өтіп, «Елімнің біріншісі» акциясын жүзеге асырды. Мерекелік шара әрмен қарай «Бәйтерек» монументінің алдында аудандық мәслихат депутаттары, аудан орталығындағы мекемелер мен ұжымдар басшылары, зиялы қауым өкілдері, қоғамдық ұйым мүшелері және тұрғындар қатысқан «Еңселі елден — Елбасына!» атты салтанатты жиынмен жалғасын тапты.
{jcomments on}Алқалы жиында алғашқы болып құттықтау сөз алған аудан әкімі Серік Зайнулдин бұл күннің халқымыз үшін ерекше екеніне тоқталды. 1991 жылы жалпыхалықтық сайлауда сайлаушылардың 97,7 пайыз дауысына ие болып, Тұңғыш Президентіміз болған Нұрсұлтан Әбішұлы сол сәттен бастап елімізді жетістіктен жетістікке жетелеп келе жатқандығын айтты. Күні кеше Елбасымыздың Қазақстан халқына арнаған жаңа Жолдауының бұл жолы да дамуымызға даңғыл жол салатындығына сенім білдірді.
— Мемлекет басшысы «Қазақстан жаңа жаһандық нақты ахуалда: өсу, реформалар, даму» атты кезекті Жолдауын жариялап, барша отандастарымызға болашаққа деген жаңа сенім, жаңа үміт ұялатты. Жаңа Жолдау алдағы атқарар істерімізді межелеп, халқымызды екпінді еңбекке жұмылдырады деп сенеміз. Тізгінді қолға алған күннен бастап Елбасы Қазақстандықтарға жақсы күндерге бірлік пен татулық, іскерлік пен қабілеттілік арқылы жетуге болатындығын дәлелдеп келеді. Тәуелсіз қазақстанның қалыптасуы Тұңғыш Президентіміз Н.Ә.Назарбаевтың басшылығымен, кең ауқымды әлеуметтік, саяси және экономикалық реформалар арқылы жүзеге асырылды. Мемлекет басшысы халықты жарқын істерге жұмылдыру, қоғамдағы татулық пен келісімді нығайту сынды халықаралық қоғамдастықтың ризашылығы мен құрметіне ие болған жаһандық және өңірлік бейбіт бастамалардың авторы ретінде елдің сыртқы саясатын дәл айқындау ісіне орасан зор үлес қосты. Мемлекет басшысының жан-жақты сараланған саясатының арқасында еліміз саяси және әлеуметтік, экономикалық кедергілерден еркін өтіп, дербес дамудың өтпелі кезеңіндегі қиындықтар мен сынақтарды еңсеріп, ілгерілеу мен өркендеу жолына шықты. Қазақстан Тәуелсіздік жылдары ішінде әлем мойындаған мемлекетке айналды. Ғасырлар бойы бабалар армандаған Тәуелсіздік туы көкте желбіреді. Елбасымыздың арқасында тарихымыз түгенделіп, тіліміз, дініміз, діліміз қайта оралып, ұлттық рәміздеріміз қабылданды,- деген Серік Зинабекұлы мемлекетіміздің, соның ішінде ауданның дамуы тікелей Тұңғыш Президентіміздің еселі еңбегінің, салиқалы саясатының ізгі нәтижесі екендігін жеткізді.
— Ауданның әлеуметтік, тұрмыстық жағдайының жақсаруын жыл сайын өркендеп келе жатқан шағын және орта бизнес саласы мен өсіп келе жатқан құрылыс нысандарынан байқауға болады. Соңғы жылдары ауданымызда сегіз жаңа мектеп, екі балабақша, 31 мектеп жанындағы балабақша, 4 ауылдық амбулатория іске қосылып, аудан өмірі үшін маңызды әлеуметтік нысандар пайдалануға берілді,- дей келе, аудан басшысы әр сала бойынша атқарылған істер мен жетістіктерді ортаға салып, барлығы да мемлекет басшысының сарабдал саясатының арқасы екендігін тағы бір мәрте атап өтті.
Мерекелік шарада еліміздің Тұңғыш Президенті Нұрсұлтан Назарбаевтың Ұлт Көшбасшысы екендігі ерекше айтылды. Сонымен бірге мемлекеттігімізді орнатып, оның қалыптасуынан бастап экономикалық және саяси реформалар арқылы қарыштап дамуына бірден-бір себепкер болған сарабдал саясаткерлік қыры да тілге тиек етілді. Елбасының аз ғана жылдар ішінде атқарған қыруар істері атап өтіліп, Ұлт Көшбасшысының келбеті, биік болмысы, кемел дарыны, көсемдігі мен шешендігі сан қырынан айқындалды.
Сондай-ақ салтанатты жиын барысында, мерекеге орай, аудан әкімінің алғыс хаттары мен «Нұр Отан» партиясының мүшелік билеттері, кәмелеттік жасқа толған азаматтарға жеке бас куәліктері тапсырылды. Мерекелік шара арнайы әзірленген концертпен жалғасты.
Бауыржан ЖАҚЫП,
«Семей таңы»
