Семей өңірі еліміздің рухани астанасы ретінде өз бағасын алған. Бұл әуелі Абай, Шәкәрім және Мұхтардай дара тұлғалардың осы ұлылар мекенінде дүниеге келуімен байланысты айтылған болса керек, сірә. Алайда қазақ әдебиеті алыптарының ізін жалғастырып, бүгінде арамызда жүрген дарынды таланттар да жоқ емес. Сондай қайталанбас тұлғалардың бірі әрі бірегейі — белгілі қаламгер, драматург, публицист, Қазақстан Жазушылар одағының мүшесі Медеу Сәрсеке. Есімі елімізге әйгілі жазушы биыл сексен жасқа толып, мерейтойын жерлестер ортасында абыроймен өткізуде. Осы ретте қаламгерге өңірде өзіндік орны бар Қазақ инновациялық гуманитарлық – заң университеті ұжымы да құрмет көрсетіп, жазушымен кездесу кешін ұйымдастырды.
Жазушымен кездесу Қаз ИГЗУ ректоры, саяси ғылымдардың докторы Шырын Құрманбаеваның бастамасымен ұйымдастырылды. Кездесудің негізгі мақсаты жастарды өнегелі ғұмырымен баршаға үлгі болған Медеу Сәрсекенің шығармашылығымен толығырақ таныстыру әрі олардың бойына отансүйгіштік қасиетті сіңіру болып табылды. Бұл шараға филология ғылымдарының докторы, профессор Арап Еспенбетов, қаладағы облыстық тарихи-өлкетану мұражайының директоры Бекен Теміров, еңбек ардагерлері, шаһардың зиялы қауым өкілдері және студент жастар қатысты. Көпшілік алдында сөз алған Арап Сләмұлы танымал ел ағасы өмірінің маңызды тұстарына тоқталып, оның қазақ әдебиетінде алар орны бөлек екендігін атап өтті.
— Құрметті зиялы қауым, ардақты ағайын! Семей өлкесінде аса ірі мәдени оқиға орын алып жатыр. Жерлесіміз, мәртебелі ағамыз, жазушы Медеу Сапаұлы Сәрсеке сексен жас-қа қадам басып отыр. Ол кісі Қызыл Қайнарда дүниеге келген. Өнегелі өмір жолында Медеу Сапаұлы мектепті алтын медальмен бітіріп, тау-кен металлургия институтын тамамдады. Семейдегі цемент зауытында бес жыл қатарынан инженер-металлург болып қызмет атқарды, сол кезден-ақ ол қаламды жанына серік етіп, журналистік һәм жазушылық өнерді бастап үлгереді. Осыдан кейін таулы Өр Алтайдың төрінде «Социалистік Қазақстан» газетінің меншікті тілшісі болады. Бұдан соң біржола әдеби жұмысқа ауысып, 30 жыл көлемінде шаһарымыздағы Қазақстан Жазушылар одағының облысаралық бөлімшесін басқара отырып, тың шығармаларын жарыққа шығарды. Медеу аға — қазақ әдебиетінде ғылыми-фантастиканың негізін салған қаламгер. Оның «Ғажайып сәуле», «Көрінбестің көлеңкесі» сынды туындыларын оқырман қауым жоғары бағалап, бұл жанрды айрықша бір құбылыс ретінде қабылдады. Нартұлғалы ағамыздың бұдан да өзге атақ-даңқтары жетерлік. Сондықтан да, құрметті Медеу Сапаұлы, сізді мерейлі мезетіңізбен құттықтаймыз!- деді Арап Еспенбетов.
Ал Қаз ИГЗУ-дің ректоры Шырын Құрманбаева жазушының шығармалары бұрынғы одақтас мемлекеттерге дейін тарағанын, жазу кеңістігінің кеңдігін, оқырмандарының одақ көлемінде қалыптасқанын атап өтті. Шырын Асылханқызы Медеу Сапаұлына Қазақ инновациялық гумантирлық – заң университетінің Құрметті профессоры атағын ресми түрде табыс етті.
— Ардақты Медеу Сапаұлы! Шақыртуымызды қабыл алып, біздің университетімізге келгеніңіз үшін, мың да бір алғысымызды білдіреміз. Қазақстанда сіздің кім екеніңізді және еңбектеріңізді білмейтін адам жоқтың қасы. Дегенмен де бүгінгі кездесуді сізді жастармен жақынырақ таныстыру мақсатында өткізуді жөн санадық. Себебі сіздің жүріп өткен дара жолыңызды біліп, өзіңізден тәлім алған адам жаман болып шықпайтыны һақ. Қымбатты Медеу аға! Профессорлық құрам мен студенттердің атынан сізге зор денсаулық тілейміз. Сіздің оқырман қауымға беретініңіз әлі де көп деп есептеймін. Сол себепті кереметтей туындыларыңыздың дү-ниеге келетініне еш шүбә келтірмейміз,- деп атап өтті Шырын Асылханқызы.
Өз кезегінде мерейтой иесі университет басшылығы мен мәртебелі меймандарға осындай келелі жиынды ұйымдастырғандары үшін ризашылығын білдірді. Әлбетте, қазақ әдебиетінде өзіндік орны, қолтаңбасы бар Медеу Сапаұлына қандай құрмет көрсетілсе де артық етпейтіндігі анық.
Жақсылық МҰРАТҚАЛИҰЛЫ,
«Семей таңы»
