Өткен аптаның соңғы жұмыс күні Достық үйінде Семей қаласы әкімінің орынбасары Надежда Шарованың қатысуымен «Елбасы Жолдауын жүзеге асыруда билік пен БАҚ арасындағы конструктивті диалог» тақырыбында жиын өтті.
Жиынды ашқан Надежда Шарова сөз басында Елбасы Н.Назарбаевтың «Қазақстан жаңа жаһандық нақты ахуалда: өсім, реформалар, даму» Жолдауын жүзеге асырудағы басым бағыттарға тоқталды. Қала әкімінің орынбасары бүгінгі әлемдік ахуалдың күрделі кезеңмен ұштасып отырғанын, дүние жүзінде орын алып отырған экономикалық дағдарыстан Қазақстанның да сырт қала алмайтынын атап өтті. Надежда Шарова, ең бастысы, өткір тұрған мәселелерді конструктивті түрде шешу жолдарын қарастыру керектігін, осы ретте шаһарда бірқатар мәселелердің барын, сондай-ақ жергілікті билік тарапынан өзекті мәселелердің тізімі жасалғанын жеткізді. Қала әкімінің орынбасары аталған мәселелерді түбегейлі шешу үшін қомақты қаражат қажет екенін, қазіргі экономикалық қиындықтарға байланысты бірінші ретте кезек күттірмес мәселелердің жұмыс жоспары әзірленіп жатқанын жеткізді.
— Жақын уақыттары оңтайландыру бойынша атқарылып жатқан жұмыс барысы туралы арнайы баспасөз жиынын өткізетін боламыз. Алдағы уақытта мәдениет пен білім беру мекемелері, ТҮКШ саласының біраз мекемелері оңтайландырылады. Алайда, айта кетуіміз керек, бұл жерде қызмет көрсететін қандай да бір мемлекеттік қызметтің қысқартылуы туралы сөз болып отырған жоқ. Оңтайландыру шаралары, яғни қысқартулар, мекеме басшылары мен әкімшілік қызметкерлерге қатысты болуы мүмкін. Айталық, қалаға қарасты 16 ауылдық округтің мәдениет үйлерінің барлығында директорлар мен есепшілер бар. Мәселен, алдағы уақытта Жаңасемей өңірінің клубтары қаламыздағы Мәдениет сарайының басшылығына берілетін болса, Абыралы өңірінің мәдениет мекемелері Қайнар ауылының клуб басшылығына берілмек. Осындай шаралар арқылы біраз қаражат үнемделетін болады. Тағы да қайталап айта кетейін, бұл жерде тек басшылық құрамның қысқартылуы сөз болып отыр, — деді қала әкімінің орынбасары.
Басқосу барысында шаһарда атқарылып жатқан бірқатар ауқымды шаралардың реті де сөз болып, Надежда Васильевна Семей шаһары мен Татарстан Республикасы арасында тығыз әріптестік байланыс орнатылғанына назар аудартты. Оның айтуынша, өткен жылдың соңында арнайы делегация Қазан қаласында болып, сапар аясында екі жақты қарым-қатынасты дамыту жөнінде арнайы жоспар әзірленіпті.
— Ағымдағы жылдың наурыз айында Қазан қаласындағы Нұрсұлтан Назарбаев көшесіне Шығыс Қазақстан облысы атынан сый ретінде тайқазан орнату жоспарланып отыр. Биылғы жылы татар ақыны Ғабдолла Тоқайдың туғанына 130 жыл толады. Осыған орай Татарстан Республикасынан қаламызға арнайы делегация келіп, Семейде ақынға арналған ескерткіштің ашылуына қатысады деп жоспарлануда. Бұл сәуір айына жоспарланып отыр. Ал экономикалық байланыс аясында қаламызда сауда үйінің ашылуы күтілуде. Ортақ кәсіпорындар ашу да жоспарда бар, — деді әкім орынбасары.
Жиында Семейде жоспарланып отырған тағы бір жобаның тұсауы кесілетіні сөз болды. Жақын күндері қаламызда «Барлығы рақмет үшін» әлеуметтік дүкендер желісі ашылмақ. Қайырымдылық дүкенін қалалық әкімдіктің қолдауымен шаһарымыздағы бірқатар қоғамдық ұйым өкілдері қолға алып отыр екен. Мақсат – әлеуметтік жағдайы төмен отбасыларға, көпбалалы және жетім балаларға тегін киім, аяқ киім, балаларға арналған киімдер мен өзге де заттар алуларына мүмкіндік жасау.
— Қоғамдық ұйымдар бізді қолдап, алдағы уақытта қаланың үш жерінен осындай үш әлеуметтік дүкендер ашуды көздеп отырмыз. Сондықтан да сіздер арқылы қала тұрғындарына өздері пайдаланбайтын киім –кешек, заттарын әкеліп тапсыруларын өтінеміз. Осылайша жобаға қолдау көрсете аламыз. Ал ол заттарды қажет еткен қала тұрғындары тегін ала алады, — дейді Надежда Шарова.
Асан МЫРЗАХАН, «Семей таңы»
