Басылымның өткен сандарында Үржар ауданының әкімі Серік Зайнулдин мен әр ауылдық округ әкімдерінің, Елбасының Жарлығына сәйкес, халық алдында есеп беру жиындарын бастағанын хабарлаған болатынбыз. 14 қаңтарда аудан орталығынан шалғай жатқан Қоңыршәулі, Қарақол сынды ауылдарынан бастау алған есептік жиындар осыдан соң Келдімұрат, Қаратұма, Көлденең, Көкөзек, Ақжар сынды ауылдық округтерде жалғасты.
Халықпен жүздесулердің барлығына дерлік аудан басшысымен бірге мәслихат хатшысы Мұхаметқали Бітімбаев, аудандық ішкі саясат бөлімінің басшысы Біржан Тұрлыбеков, білім, дене шынықтыру және спорт бөлімінің басшысы Сәуле Жүнісова, кәсіпкерлік және ауылшаруашылық бөлімінің басшысы Қаленбек Қарашев, аудандық ІІБ басшысы, полковник Нұрлан Дүйсекенов, аудандық орталық аурухананың бас дәрігері Жексенбай Тілеуберлин, аудандық жұмыспен қамту орталығының директоры Берікхан Ғалиев және БАҚ өкілдері қатысты.
Есептік кездесулердің барлығында да ауыл әкімдері аудан басшысына атқарылған жұмыстар жайлы есеп беріп, үстіміздегі жылы жүзеге асыру межеленіп отырған жұмыс жоспарларымен бөлісті.
Ауылдық округтердің тыныс-тіршілігімен таныс-қан аудан әкімі Серік Зайнулдин есепті жылы ауданның бағындырған белестерін бағамдап берді. Үржардың дамуына әр сала бойынша кеңінен тоқталған өңір басшысы халықпен жүздесу барысында тұрғындардың сауалдары мен өтініштеріне де құлақ түрді.
Келдімұраттықтармен кездесуде ауылдық округ әкімі Қабыл Қасенов есепті жылы еңсерілген істер жайлы баяндаған соң, ауыл халқы өтініш-тілек, сауалдарын ортаға салды. Тарихи Отанына оралған Гүлнұр Кәрімтай есімді тұрғын аудан басшысынан материалдық тұрғыдан көмек сұрады. Өтініш білдіруші азаматшаның 4 жасар баласы бар жал-ғыз басты ана екендігін ескерген Серік Зинабекұлы «Нұр Отан» партиясының Үржар аудандық филиалы арқылы ақпан айында 100 000 теңге қаржылай қолдау көрсетілетінін жеткізді. Аудан басшысына бағытталған екінші сауал су мәселесіне қатысты болды. Ауыл тұрғыны Райгүл Сапарғалиева, Келдімұратқа су тартылған кезде, өзі қоныстанған көшеге су құбыры тартылмағанын айтты. Аудан басшысы өз жауабында кезең-кезеңімен жоспарлы түрде құбыр тартылатындығын мәлімдеді.
Кезекті жиын Қаратұма ауылында өтті. Ауыл әкімі Болат Дұзақпаев Қаратұманың дамуы тұрғысында есеп берді. Біраз уақыт бұрын денсаулығына байланысты қызметтен босатылуын сұрап аудан басшысына өтініш білдірген Болат Оспанұлының өтінішін аудан басшысы қанағаттандырды. Осы жиында Серік Зинабекұлы салтанатты түрде Б.Дұзақпаевтың иығына шапан жауып, алғысын білдіріп шығарып салды. Осыдан соң тұрғындар бұрынғы әкімнің орнына ауыл азаматы Марат Батырбаевты тағайындауды сұрады. Алайда аудан басшысы бұл заңға қайшы әрекет болып табылатындығын айтып, әкім тағайындау мәселесі заң аясында қарастырылатындығын мәлімдеді. Келесі сауалды жолдаған Тұрсынғали Таласпаев, тұрғындар бірнеше облыстық басылымдарға жазылғанымен, ауылға «Семей таңы» және «Уақыт тынысы» газеттері ғана уақтылы келетінін, республикалық газет-журналдар кешеуілдейтінін айтты. Аудан басшысы бұл мәселені ауыл әкіміне әрдайым қадағалап отыруды тапсырды.
Ал кезекті сауалды жолдаған Сейсенхан Сағатпаевтың айтуынша, бұрын ауылда әр 200 метр сайын колонка болған екен. Ауыз су мәселесі енді қалай шешімін табатындығын сұраған азаматқа ТҮКШ бөлімінің басшысы Дидар Хамитов ЭВМ бағдарламасы бойынша сметалық құжат дайындалғанын, 2017 жылы мәселе шешілетіндігін хабарлады.
Сонымен бірге Серік Зинабекұлы алдағы уақытта Қаратұма – Науалы бағытындағы жолдың жөнделетіндігі жөнінде халыққа жағымды жаңалық жеткізді.
Көлденең ауылдық округінде болған жиында ауыл әкімі Сайлаухан Истемисов атқарылған істер жөнінде айтып өтті. Ал Көкөзек ауылдық округінде өткен жиында ауыл әкімі Асхат Ахметов өткен жылы атқарылған істер жайлы баяндаған соң, ауыз су мәселесіне қатысты аудан әкіміне өтініш білдірді. Осы ретте Серік Зинабекұлы «Нұрлы жол» бағдарламасы аясында алдағы уақытта су тартылатынын жеткізді.
Есеп беру жиыны осыдан соң Ақжар ауылдық округінде жалғасты. Амангелді, Қарамойыл ауылдары қарайтын бұл округтің тыныс-тіршілігін баяндаған округ әкімі Тәуіржан Шоманов аталмыш елдімекендерден оқушыларды тасымалдауға автобус берілсе деген тілегін білдірді. Сонымен бірге ауыл тұрғыны Төлеуғажы Қайыркөбенов: «1969 жылы қабырғасы қаланған мектеп ғимараты өткен 2015 жылы жабылды. Ғимараттың құжаты жоқ болғандықтан, аукционға салынбай, халық игілігіне берілсе, алдағы уақытта мешіт, қатымхана жасасақ»,- деп өтінішін білдірді. Тұрғындардың бұл өтінішін қанағаттандырған аудан әкімі Серік Зайнулдин ғимараттың халық игілігіне берілетінін атап өтті.
Қорыта айтсақ, аңдағанымыз — барлық жиындарда да сауалдардан гөрі аудан әкіміне деген алғыс, игі тілектер басым болды. Сөз алып Серік Зинабекұлына бата берсем деген халықтың тілегін көріп, аудан басшысына берілген жоғары баға деп түйдік. Аудан басшысы да ауылдық округ әкімдерінің жұмысын өз кезегінде саралап, бағалап отырды. Тұрғындардың жүзіндегі жылы шырайдан-ақ ауылдардың жағдайы жаман еместігін байқауға болады. Лайым солай болғай!
Бауыржан ЖАҚЫП,
«Семей таңы»
