Аграрлық ғылымды дамытпайынша, ауыл шаруашылығы саласы алға баспайтынына анық көз жеткен. Әлбетте, өнімділікті арттыруға өндіріс пен ғылымды ұштастыру арқылы қол жеткізуге болады. Мемлекет басшысы Н.Ә.Назарбаев қоғам өмірінің шешуші салаларын жаңғыртуға бағытталған «Ұлт жоспары – 100 нақты қадамында» инвестиция мен трансұлттық компаниялар арқылы аграрлық сектордың зор мүмкіндіктерін ашу керектігін мықтап тапсырды.
Міне, өндіріс пен ғылымды ұштастыру, осы салаға мейлінше инновацияны кіріктіру бағытында Семей қаласының Шәкәрім атындағы мемлекеттік университетінде канадалық «Alta Genetics Inc.» халықаралық компаниясы Ветеринария және мал шаруашылығының ғылыми – инновациалық орталығының қолдауыменен «Қазақстанның мал шаруашылығындағы өзекті мәселелері және оларды шешу жолдары» атты семинар өткізілді.
Аграрлық сектордың сүт өнімдерімен айналысатын кәсіпорындарының дамуына үлес қосу мақсатында ұйымдастырылған семинарға Канаданың «Alta Genetics Inc.» компаниясы мен Голландияның «Альта Дженетикс Инк.» мамандарының және «Aльта Дженетикс Инк.» сарапшылары қатысты. Сондай–ақ семинар жұмысына Республикалық сүт бағытындағы ірі қара мал шаруашылығы палатасының атқарушы директоры К.Елемесов, Ветеринария және мал шаруашылығының ғылыми-инновациялық орталығының директоры А.Сагимбаев, «Alta Azia» дистрибьютты орталығының директоры Б.Жакупов және Шығыс Қазақстан облысы ауыл шаруашылығы басқармасының мамандары қатысты.
Семинар барысында сүтті мал шаруашылығымен айналысатын ауыл шаруашылығы үшін маңызды бірқатар сұрақтар қарастырылды. Атап айтар болсақ, сүтті мал шаруашылығындағы селекциялық — тұқымдық жұмысының маңызды мәселелері, ауыл шаруашылығын қаржыландыру, ірі қараларды жасанды ұрықтандыру, кездесетін ауруларды анықтау, оның белгілері мен емдеу әдістері сөз болды. Сондай-ақ жемшөп базасы және сүтті ірі қараларды азықтандыру мәселелері де сала мамандарының талқысына салынды.
Семинар соңы жасанды ұрықтандыру мамандарын дайындайтын орталықтың ашылуымен жалғасты. Семей қаласының Шәкәрім атындағы мемлекеттік университетінің «Агротехнопарк» базасы аясындағы орталық болашақта шаруа қожалығында асыл тұқымды ірі қараларды жасанды түрде ұрықтандыратын мамандарды әзірлейді.
Айта кету керек, «Агротехнопарк» ғылыми орталығы базасы аясында ауылшаруашылық малдарын жеделдетіп өсіру орталығы жұмыс жасайды. Орталық жасанды ұрықтандыру және буаз малды анықтауға, өгіздердің ұрықтарын сақтауға және тасымалдауға арналған заманауи құралдармен жабдықталған. Сонымен қатар аталмыш орталықта әрбір шаруашылық өз біліктілігін арттырып, селекциялық – тұқымдық жұмыстарын жүзеге асыра алады.
Асан МЫРЗАХАН,
«Семей таңы»
