Жуырда Семей қаласында «Барлығы рақмет үшін» дүкендер желісі жұмысын бастайды. Егер өзіңізге қажет деп таппаған жеке заттарыңыз, тұрмыстық техникалар, киім – кешектеріңіз болса, аталмыш дүкенге өткізуге болады. Ал сіздің әкелген заттарыңызға мұқтаж жандардың бар екенін ескерсеңіз, әлбетте, алғысқа бөленетініңіз анық. Сондықтан аталған жобаны қолға алушылар дүкендер желісін «Барлығы рақмет үшін» деп бекер атамаса керек. Семейліктердің ерекше қызығушылығын тудырып отырған дүкендердің жұмысы жайында жан – жақты мағлұмат апта дүйсенбісінде қаланың Ақпараттық орталығында өткен баспасөз мәслихатында берілді.
Айта кету керек, дүкенге өткізген заттар тек әлеуметтік аз қамтылған отбасыларға, мүмкіндігі шектеулі азаматтар мен көмекке мұқтаж жандарға беріледі. Жобаның негізгі мақсаты да осы. Мұндай бастаманы «Исток» балалар мен жастардың шығармашылық орталығы», «Іскер әйелдер ассоциациясы», «Жанұя орталығы», «Әйелдер және білім беру» қоғамдық бірлестігі және ШҚО Кәсіпкерлер палатасының Семей қалалық филиалы бірлесе жүзеге асырып отыр. Дүкендер желісі ақпан айының басында ашылады деп күтілуде. Әзірге тұрмыстық заттарды қабылдау жұмыстары жүріп жатыр.
— ШҚО Кәсіпкерлер палатасының Семейдегі филиалы, мемлекеттік емес ұйымдардың бастамасымен және қалалық әкімдіктің қолдауымен жоба жүзеге асырылуда. Бұған қала кәсіпкерлері де айтарлықтай өз үлестерін қоса білді. Мәселен, «Елжан» сауда үйі мен «Солтүстік» сауда-логис- тикалық орталығының қожайындары бізге сауда нүктелерін тегін түрде ұсынып отырғаны — үлкен қолдау. Сондай-ақ бірқатар азаматтар дүкендерді қажетті жиһазбен қамтамасыз етуге ниетті екендіктерін жеткізді,- деп атап өтті ШҚО Кәсіпкерлер палатасы Семей қалалық филиалының директоры Ардақ Әділжанов.
Ал «Жанұя орталығы» қоғамдық қорының жетекшісі Людмила Асташкина «Барлығы рақмет үшін» дүкені қоғамдағы әлеуметтік теңсіздік мәселесін шешуге септігін тигізетініне сенім білдірді.
— Әлеуметтік жоба белгілі бір науқан шеңберінде ғана халыққа қызмет атқарады деген ойдан аулақпыз. Қаланың белсенді азаматтарының демеушілігімен оның жұмысы жандана түсетініне сеніммен қараймыз. Онда келген адамдар өздерін басқалардан қарағанда кем санамауы тиіс. Сол себепті де оның ішіндегі жиһаздар мен керекті құрал-жабдықтарды жаңадан алғанды жөн санадық. Қоғамда әлеуметтік мәселелер аз болса, біздің еліміздің бірлігі нығая түседі деп ойлаймын,- деді өз сөзінде Людмила Михайловна.
Баспасөз мәслихатында сөз алған «Іскер әйелдер ассоциациясы» қоғамдық бірлестігінің төрайымы Айнұр Арғынбекова қазіргі экономикалық тұрғыдан күрделі кезеңде бұл дүкендер желісі мүмкіндігі шектеулі жандар мен әлеуметтік тұрғыдан әлжуаз топтарға үлкен қолдау болатынын жеткізді. Тағы бір айта кетерлігі, әлеуметтік нысандар мемлекеттік емес ұйымдардың ұдайы бақылауында болады.
Баспасөз мәслихатына қатысушылар аталмыш жобаға үлес қосуға ниетті азаматтар үшін қашанда есік ашық екенін бір ауыздан атап өтті. Айта кетейік, тұрмыстық заттарды қабылдау «Исток», «Жанұя орталығы» және «Әйелдер және білім беру» қоғамдық бірлестіктерінде жүргізіледі.
Жақсылық МҰРАТҚАЛИҰЛЫ,
«Семей таңы»
