Әзірге қысқы жылыту маусымы ойдағыдай өтуде. Жылу беруде мәселе жоқ. Жылыту маусымы басталғалы, тұрғындар тарапынан да айтарлықтай арыз – шағымдар тіркелмеген. Біраз жыл бұрын жылуы жырға айналған Семейдің қазандықтары мен жылу құбырлары қалыпқа келтірілгеніне көз жеткізуге болады.
Семей қаласының Ақпараттық орталығында биылғы жылыту маусымының өту барысы жайында БАҚ өкілдеріне арнал- ған баспасөз мәслихаты ұйымдастырылды. Баспасөз мәслихатына Семей қаласы тұрғын үй — коммуналдық шаруашылық, жолаушылар көлігі және автомобиль жолдары бөлімінің бас маманы Амантай Өтелбаев, Семей қаласы тұрғын үй инспекциясының басшысы Светлана Заурбекова, қалалық жылу инспекциясының басшысы Жұман Мусин қатысты.
Алдымен Амантай Өтелбаев қаладағы барлық жылу көздерінің кестеге сәйкес жұмыс істеп тұрғаны, көмір қорының жылу маусымының аяғына дейін жететіні туралы ақпарат берді.
— Бүгінгі таңда шаһардағы пәтерлер жылумен әрі ыстық сумен қамтылып отыр. Дегенмен кішігірім апатты жағдайлардың орын алатыны жасырын емес. Мұндай жағдайда дер кезінде алдын алу жұмыстары жүйелі жүргізіледі. Ал РК-1 жылу қазандығына келер болсақ, «Нұрлы жол» мемлекеттік бағдарламасы аясында жаңғырту жұмыстары жүруде. Қазіргі уақытта нысанда 2 бу және 1 су қазандығы іске қосылып тұр. Бұл қуат мөлшері 25 градус аязға дейін жұмыс істеуге мүмкіндік беруде,- деді Амантай Өтелбаев.
Десе де қаланың сол жағалау тұрғындарына, ауа райы күрт төмендегенде, ыстық су берілмей қалатын көрінеді. Аталмыш мәселені қалалық жылу инспекциясының басшысы Жұман Мусин түсіндірді.
— Тұрғындар дұрыс түсінсе екен дейміз. Ауа райы күрт төмендеген жағдайда, пәтерлердегі жылуды ұстап тұру үшін біз ыстық су беруді тоқтатуға мәжбүрміз. Бұл РК-1 жылу қазандығы толыққанды іске қосылғанға дейін жалғасатын болады. Бүгінде аталмыш жылу орталығында үш Е-35 маркалы қуатты энергоқазандықтар орнатылуда. Ол іске қосылғаннан кейін, жылу мен ыстық су қалыпты жағдайға түсетін болады,- дейді Жұман Мусин.
Баспасөз мәслихатына қатысушылар «Нұрлы жол» мемлекеттік бағдарламасы бойынша тозығы жеткен инженерлік желілердің ауыстырылуы шаһардағы көптеген түйткілді мәселелердің оң шешілуіне септігін тигізгенін жеткізді.
Жақсылық МҰРАТҚАЛИҰЛЫ, «Семей таңы»
