«Нұр Отан» партиясының Семей қалалық филиалында «Нұр Отан» партиясының кезектен тыс XVII съезінің делегаттары, қоғам өкілдері, БАҚ өкілдерінің қатысуымен арнайы брифинг болып өтті. Басқосу барысында ағымдағы жылдың 20 наурызында белгіленген Қазақстан Республикасы Парламенті Мәжілісі мен мәслихат депутаттарының сайлауына даярлық шаралары туралы мәліметтер ортаға салынды
Брифингті «Нұр Отан» партиясының Семей қалалық филиалы төрағасының орынбасары Зульфия Жамалтдинова алғысөзбен ашты. Ең әуелі еліміз бойынша аса маңызды саяси науқан – алдағы халық қалаулыларын сайлау туралы сөз қозғаған З. Фазылжанқызы дәл бүгінде қалалық мәслихат депутаттығына үміткерлердің прайм-риз шарасы сәтімен аяқталғанын атап өтті. Дәл қазіргі күні өңіріміз бойынша 72 партия мүшесі аталмыш рәсімді өткізіп, келесі мәреге жол тартыпты. Айта кетерлігі, әр округ бойынша үш-үштен үміткер сынға түспек. Ал облыстық мәслихат депутаттығына кандидаттар бүгін, апта сейсенбісінде өз сайлауалды бағдарламаларын таныстыратын болады. Ал билік партиясының нақты қанша өкілі сайлау науқанына жол тартқаны ақпан айының 10-ы күні ҚазИГЗУ-де өтетін партия конференциясында нақтыланбақ. Осылай деп атап өткен Зульфия Фазылжанқызы сайлауалды үгіт-насихат жұмыстарының 20 ақпаннан бастау алатынын да жеткізе кетті.
— Біздің филиал алдағы маңызды саяси науқанға тас-түйін даяр. Партияның үгіт-насихат жұмыстарына 400-дей жастардан құралған еріктілер көмек көрсететін болады. Дәл қазіргі күні қалалық мәслихат депутаттығына үміткерлер қатары анықталды. Олардың арасында жас буын өкілдері көп, әйелдер қауымы баршылық. Ал үміткерлердің есімдерін тек 20 ақпаннан кейін ғана айта аламыз, — деді өз сөзінде З.Жамалтдинова. Бөлім басшысының орынбасарының сөзіне сүйенсек, «Нұр Отан» партиясы өзінің 2012 жылғы сайлаудағы бағдарламасын толыққанды орындап, ел өміріне серпін әкелер шараларды іске асырған.
Осыдан соң партияның Астана қаласында өткен кезектен тыс XVII съезінің делегаты Гүлнар Шәріпова сөз алып, аталмыш жиынның ерекшелігіне тоқталып өтті.
-Елбасы, Ұлт Көшбасшысы, «Нұр Отан» партиясының төрағасы Нұрсұлтан Назарбаев партия мүшелеріне тың тапсырмалар тұрғанын атап өтті. Бұл ретте Ұлт жоспары партияның сайлауалды бағдарламасының негізгі өзегін құрайды, — деді съезд делегаты. Осыдан соң жиын пікіралмасумен өрбіп, сайлау науқанына даярлық шаралар жайында келелі әңгіме қозғалды.
Қуаныш ЖОЛЫМБЕТ,
«Семей таңы»
