Осыдан біраз уақыт бұрын Үржар ауданында «Ардагерлерді ардақтайық» атты «Нұр Отан» партиясының жобасы бойынша қайырымдылық ісі бастау алған болатын. Аға буын өкілдеріне құрмет пен ілтипат көрсетуді негіз еткен жаңа жоба аясында аудандық «Нұр Отан» партиясы филиалының төрағасы Серік Зайнулдиннің бастамасымен ауданның әлеуметтік-экономикалық дамуына зор үлестерін қосқан жиырмадан астам ақ жаулықты әжелеріміз бен қарияларымызға арнайы құттықтау хаттар мен бағалы сыйлықтар табыс етілген еді.
Нақтырақ айтсақ, аталмыш жоба аясында аудандық филиалдың бірінші орынбасары Б.Баймұратов пен аудандық мәслихат хатшысы М.Бітімбаев әрбір қарттың шаңырағына барып, аудан әкімі Серік Зинабекұлының ыстық сәлемін жеткізіп, хал-жағдайларын біліп, Жаңа жыл мерекесімен құттықтаған еді. Ал өз кезектерінде қарттарымыз да өз ілтипаттарын білдіріп, рақметтерін жаудырды. Осынау игілікті шара аясында өңірдегі әрбір ардагердің жергілікті атқарушы биліктің назарынан тыс қалдырылмайтынын атап өткен жөн. Ал бұл игілікті істе аудан әкіміне жастар көмектесуде. Осылайша қазіргі күні аудан басшысының бастауымен жолға қойыл-ған бұл шара қоғамдық тұрғыдан қолдау тауып, жарасымды түрде жалғасуда. Аталмыш үрдіс — «Ардагерлерді ардақтайық» акциясы аясында Үржар ауданында «Жас Отан» жастар қанаты мен Жастар орталығы өкілдерінің күш салуымен арнайы онкүндік ұйымдастырылды. Аудан орталығындағы жалғыз басты қарт адамдар және соғыс ардагерлеріне жас буын тарапынан қолғабыс жасалды. Атап айтсақ, ауладағы қарды тазалау, отын әзірлеу ісінде іргелі көмек көрсетілді. Акцияға аудандағы белсенді жастар және мектептердің жоғары сынып оқушылары белсене атсалысты.
Соғыс ардагері Иван Понковец өздерін әрқашан қолдап, қошемет көрсетіп, көмек беріп, қадірлеп отырған аудан басшысы Серік Зайнулдинге, оның жас көмекшілеріне шексіз алғысын білдіріп, осындай берері мол өнегелі бастаманың бел ортасында жүретін аудандық Жастар орталығының басшысы Азамат Халықовқа жергілікті ардагерлер қауымы атынан ризашылығын жеткізді.
Жалпы, осынау акцияға жүз елуге жуық жас тартылып, бір күннің ішінде он екі ардагерге көмек көрсетілді. Ал мұндай шара алдағы уақытта, яғни жыл көлемінде жалғастық табатынын айтсақ, аға буынға көрсетілер құрметтің қаншалықты зор болатынын аңғару қиын емес. Сонымен қатар Үржар аудандық Жастар орталығының басшысы, белсенді жастардың ұйыт-қысы Азамат Халықов «Ардагерлерді ардақтайық» акциясы бойынша аудан әкімі Серік Зинабекұлының бастамасымен тағы да бірқатар шаралар жүзеге асырылып, қарттарға құрмет көрсету үлгісі жаңаша қырынан көрініс таба беретінін де айтты.
— Ардагерлер – бұл қоғамның игілігі, дегенмен бүгінгі таңда оларды өз қамқорлығымызға алып, қолымыздан келгенше көмек көрсету қажет. Мұндай шараны ұйымдастырудағы атап өтетін маңызды мақсаттардың бірі – ұрпақтар сабақтастықтығын қалыптастыру. Дәл осы көмек көрсетіп жүрген жастар, болашақ ұрпақтың бақуатты да бейбіт өмір сүруі үшін, өзінің ерік-жігері мен күш-қуатын аямаған ардақтыларымызбен тілдескен өнегелі ұрпақ болып қалыптасатыны анық жайт. Сондықтан да ардагерлерге құрмет танытып, көмек көрсетумен ғана шектеліп қалмай, олардың елімізді өркендетудегі жетістіктерін, соғыс ардагерлерінің жауынгерлік ерліктерін келешек ұрпаққа насихат ретінде жеткізудің маңыздылығы орасан зор деп білемін. Бүгін де аталмыш дәстүрді жалғастыра отырып, біз осынау акция аясында ардагерлерімізді қолдауға бар күш-жігерімізді салатынымызға сеніміміз мол. Аймағымыздың барлық жастарын ардагерлерді ардақтап, қайырымды істер ұйымдастыруға шақырамыз, — дейді белсенді жастардың бел ортасында жүрген Азамат Халықов.
Сөз орайында айта кетейік, «Нұр Отан» партиясы ұрпақтар сабақтастығы мен диалог алаңын қамтамасыз ету, қоғамда ынтымақ пен патриотизмді, қарт адамдарға және дәстүрге деген құрметті күшейту, соғысқа қатысқан қазақстандықтардың ерліктерін мәңгі есте сақтау мақсатында «Жастар – Отанға!» еріктілерінің қатысуымен «Ардагерлерді ардақтайық!» жобасын жүзеге асыруды бастаған болатын. Аталмыш жоба қазақстандықтарды соғысқа қатысқан майдангерлердің әскери және еңбектегі ерліктерін мақтан етіп, аға буын ұрпаққа құрметпен қарауға тәрбиелеуге, сондай-ақ ұрпақтар арасындағы үнқатысуды қамтамасыз етуге және соғыс ардагерлері мен тыл еңбеккерлерінің, жалғыз басты қариялардың өмір сапасын арттыру арқылы әлеуметтік бейім-деуге бағытталған. Акция аясында Үржар ауданында тұратын соғыс ардагерлерінің өмір сүру жағдайы зерттеліп, нәтижесінде бірқатар мәселе аудан әкімінің өз бақылауына алын- ған болатын. Солардың ішінде тұрғын үй мәселесі, медициналық-әлеуметтік қызмет көрсету, жастар көмегі және қарттардың уақыттарын тиімді өткізулеріне жағдай жасау мәселелері қарастырылды. Мақаншы, Таскескен ауылдарында ардагерлер үйі ашылды.
Жоба аясында бұдан өзге де ілкімді істер жүзеге асуда. Бұл ретте әр кез кездескен сайын ауыл ардагерлеріне баса мән беретін аудан әкімі Серік Зайнулдиннің жеке бастамасымен, қарттарға құрмет көрсетудің айрықша үлгісі қолға алынғанын атап өткен жөн. Бір ғана мысал, өткен жылы Алакөлдың жағалауында орналасқан «Үржарайым» демалыс үйінде 75 еңбек ардагерінің демалысы ұйымдастырылыпты. Алдағы уақыттарда мұндай шаралардың қатары арта берері анық.
Қуаныш ЖОЛЫМБЕТ,
«Семей таңы»
