Шығыс Қазақстан облысының тұрақтандыру қорында қосымша қордың болуы азық-түліктің негізгі түрлерінің бағамын төмендетуге мүмкіндік береді. Ағымдағы жылдың 1 наурызына дейін өңірде картоп, орамжапырақ, қызылша, сарымсақ және сәбіздің келісі 60 теңгеден сатылады.
Мұндай шешім Шығыс Қазақстан облысы әкімінің орынбасары Дүйсенғазы Мусиннің төрағалығымен өткен өңірлік тұрақтандыру қорын басқару бойынша комиссия отырысында қабылданды.
Облыс әкімінің орынбасары бұған қоса Өскемен және Семей қалаларының әкімдеріне тұрақтандыру қоры өнімдерін саудалайтын нүктелерді көбейтуді тапсырды. Бүгінде көкөніс өнімдері 183 сауда орындарына шығарылуда. Оның ішінде Өскемен қаласында 103, Семей қаласында 65 сауда нүктесі арқылы тұтынушыларға ұсынылуда. Биылғы жылы облыс орталығында 4 мың тонна, Семейде 5,7 тонна көкөніс өнімдері сатылып алынған.
Айта кеткен жөн, тұрақтандыру қорын ұйымдастырудағы негізгі мақсат — өңірдегі азық-түлік нарқын реттеуге ықпал ету, сұранысқа ие көкөніс түрлері бағаларының маусымдық шарықтауын тежеу, өнім бағасының негізсіз өсуін болдырмау және алыпсатарлыққа жол бермеу арқылы нарықта тиімді баға саясатын қалыптастыру.
ШҚО әкімінің баспасөз қызметі.
