2015 жылы Шығыс Қазақстан облысында құрылысы ұзаққа созыл-ған нысандар рекордтық көлемде тапсырылды. Өткен жылы «күрделі» құрылыс нысандары ерекше бақылауда болды. Айта кету керек, 2004 жылдан бері аймақтағы құрылысы ұзаққа созылған нысандардың саны 118-ге жеткен болатын. Облыс әкімі Даниал Ахметовтің басшылығымен қолға алынған қарқынды жұмыстың нәтижесінде өткен жылы 94 нысан, немесе жалпы көрсеткіштің 80 пайызы пайдалануға берілді.
Құрылысы ұзаққа созылған нысандарға жауапты болған барлық мердігер компаниялар «қара тізімге» енгізілді және тендерге қатысу мүмкіндігінен айырылды. Бұл ретте құрылыс нормалары мен ережелердің қатаң сақталуын облыс әкімі Даниал Ахметов жіті бақылауында ұстады.
Атқарылған жұмыстардың қорытындысы бойынша, 2015 жылы 45 әлеуметтік — мәдени және 34 тұрғын үй, 9 энергетика саласындағы нысан пайдалануға беріліп, 6 жобалық-сметалық құжат дайындалды. Аталған нысандардың ішінде құрылысы 2008 жылдан бері жалғасып келе жатқан Өскемен қаласындағы Қан орталығы, 1000 орындық мектеп (2012 жылдан бастап), 2014 жылдан бастап құрылысы аяқталмай келе жатқан Семей қаласындағы облыстық онкологиялық диспансердің радиологиялық орталығы бар. Сондай-ақ Глубокое ауданындағы Зимовьево интернат-үйінің, Зырян ауданының Чапаев ауылындағы 130 орынға арналған орта мектеп құрылысы аяқталды.
ШҚО Құрылыс, сәулет және қала құрылысы басқармасының басшысы Мәди Отарбаевтың айтуынша, құрылысы 2016 жылға қалдырылған 24 нысанның уақтылы тапсырылуы үшін, ведомство бар күш-жігерін салады.
Биылғы жылы Зырян ауданындағы бұрынғы Грехов кен орнының әкімшілік ғимаратында жөндеу жұмыстары жүргізіліп, мүмкіндігі шектеулі жандарға арналған оңалту орталығына айналды. Тарбағатай ауданының Ақсуат ауылында спорт модулі салынады. Оқу жылының бас кезіне қарай Үржар ауданының Қабанбай ауылында 320 орындық және Күршім ауданының Үшбұлақ ауданында 80 орындық мектепті пайдалануға беру жоспарлануда.
ШҚО әкімінің баспасөз қызметі.
