4 ақпан күні әлеуметтік аз қамтылған, тұрмысы төмен, көпбалалы отбасыларды тегін киім – кешек, керек – жарақ, тұрмыстық заттармен қатамасыз ету мақсатында Семейдегі бірқатар кәсіпкерлер, қоғамдық бірлестіктер, мемлекеттік емес ұйымдардың бастамасымен қолға алынған «Барлығы рақмет үшін» дүкендер желісінің жұмысы басталды. Шаһардың Энергетик кентіндегі «Солтүстік» сауда — логистикалық орталығы мен 14-ықшам ауданда, Первомайская көшесі, 79 мекенжайындағы «Елжан» сауда үйінде аталмыш дүкен желісінің нүктелері салтанатты түрде ашылды.
«Солтүстік» сауда — логистикалық орталығындағы айтулы шараға қалалық жұмыспен қамту және әлеуметтік бағдарламалар бөлімі басшысының міндетін атқарушы Азамат Құрманғалиев, ҰКП –нің ШҚО филиалының директоры Игорь Шацкий, қалалық ардагерлер кеңесінің төрағасы Амантай Доғалақов, үкіметтік емес ұйымдармен, қоғамдық бірлестіктер өкілдері, қала тұрғындары қатысты.
Жобаның көздегені қоғамдағы әлеуметтік әлжуаз топтар мен мүмкіндігі шектеулі жандарды қажетті тұрмыстық заттармен қамтамасыз ету болып табылады. Осы әлеуметтік идеяны жүзеге асыруға «Исток» балалар мен жастардың шығармашылық орталығы», «Іскер әйелдер ассоциациясы», «Жанұя орталығы» және «Әйелдер және білім беру» қоғамдық бірлестігі бастамашыл бол-ған. Семей қалалық жұмыспен қамту және әлеуметтік бағдарламалар бөлімі басшысының міндетін атқарушы Азамат Құрманғалиев әлеуметтік дүкеннің ашылуы ҮЕҰ, кәсіпкерлер мен атқарушы билік арасындағы тығыз әріптестік байланыстың айқын дәлелі екеніне ерекше тоқталып өтті.
— Бұл өз кезегінде қаладағы әлеуметтік жағынан аз қамтылған отбасыларға үлкен көмек болатынына сенім білдіреміз. Бұл жердегі барлық заттар тегін түрде берілетін болады. Дүкеннің жұмысы жақсы жүйеге келтіріліп, оның өміршеңдігі ұзаққа созылады деген үміттеміз. Әлеуметтік жобаны іске асыруға ұйытқы болған барлық қоғамдық ұйымдар мен кәсіпкерлерге алғысымыз шексіз, — деп атап өтті Азамат Амангелдіұлы.
ҰКП –нің ШҚО филиалының директоры Игорь Шацкий әлеуметтік дүкеннің ашылуымен семейліктердің өзге өңірлерге үлгі боларлықтай бастама көтергенін айта келе, аймақ кәсіпкерлері осы бағыттағы жұмыстарды толығымен қолдауға әзір екендіктерін білдіргенін атап өтті.
— Жобаның жүзеге асуын көпшілік қауымның күткені белгілі. Кәсіпкерлер палатасы өз тарапынан мүмкіндігінше демеушілік көрсетуге дайын. Бүгінде сіздердің бастамаларыңызды өзге аймақтар да іліп әкетуде. Мәселен, жуық арада осыған ұқсас дүкендер желісі Маңғыстау, Ақтөбе, Оңтүстік Қазақстан облыстары мен Алматы және Астана қалаларында ашылады деп жоспарланып отыр екен. Қорыта айтқанда, Семей қаласының тұрғындары еліміздің өзге өңірлеріне жақсы қырынан таныла білді,- деп атап өтті Игорь Шацкий.
Айта кету керек, дүкен сөрелері қала тұрғындарының қайтарымсыз беретін тауарларының есебінен толығып отырады.
Жақсылық СҮЛЕЙМЕН,
«Семей таңы»
